Павлодарда балалар байқауының жеңімпаздары сыйлықтарға ие болды
«ҚТЖ – Жүк тасымалы» ЖШС-ның Павлодар бөлімшесінде «Әкем, анам, мен Сіздерді аман-есен үйде күтемін!», «Қауіпсіздік, ең алдымен!», «Есіңізде болсын, сізді үйде күтеді!» тақырыбындағы балалар суреттері байқауының қорытындысы шығарылды.
Байқауға бөлімше қызметкерлерінің 50-ден астам балалары қатысты. Оның мақсаты – жастардың темір жол нысандарында қауіпсіз жүріп-тұру, ата-аналардың еңбегі мен еңбекті қорғауға құрметпен қарауы мәдениетін қалыптастыру.
«Әр жұмыс өз деңгейімен ерекшеленеді, сондықтан да ең қызықты да әсерлілерін таңдау қиын болды. Қазылар алқасы тақырыптың ашылуын, идеяның бірегейлігі мен орындау техникасын, авторлардың шығармашылық тәсілі мен көркемдік шеберлігін ескерді», - деді Павлодар бөлімшесі кәсіподақ комитетінің төрайымы Айгүл Махметова.
Байқау қорытындысы бойынша бірінші орынды Екібастұз вагон депосы техникалық бөлімі бастығының ұлы Батырлан Нығмет, екінші орынды Екібастұз локомотив депосы тепловоз машинисінің қызы Инабат Абылайхан иеленді. Үшінші орын Үшқұлын станциясы тауар кассирінің ұлы Батырбек Бектасовқа бұйырды.
Барлық қатысушылар ынталандыру сыйлықтарымен марапатталды. Марапаттау рәсімінен кейін оларды жағымды тосынсыйлар: сабынды көпіршіктер, қағаз дискотекасы, балмұздақ, тәтті сусындар мен кино билеттері қуантты.