Опорная станциясында ұзақ жыл еңбек еткен ерлі-зайыптылар бір күнде зейнетке шықты

Маңғыстау теміржолының Бейнеу–Құлсары телімінде орналасқан төртінші класты Опорная станциясында саналы ғұмырының сәнді де мәнді жылдарын өткізген ерлі-зайыпты теміржолшылар кәсіби мереке қарсаңында зейнеткерлік демалысқа шықты. Әріптестері қимай қоштасып, ақ тілекпен шығарып салған қос теміржолшы – Опорная станциясының бастығы Мұртаза Алдоңғаров пен станция вокзалын тазалаушы Сания Кокимова. Ерлі-зайыптылардың Опорная станциясы үшін еткен еңбегі енді өткен күндер естелігіне айналмақ. Жұмысқа бірге келіп, бір салада талай жыл қатар жұмыс істеген олар енді зейнеттік демалысқа да қол ұстасып бірге аттанды. 44 жыл осы салада тер төгіп келе жатқан Мұртаза Алдоңғаров еңбек жолын 1976 жылы Атырауда бастапты. Маңғыстау теміржолына 1979 жылы келген. Сол жылы Опорная станциясына пойыз құрастырушының көмекшісі жұмысына кіріседі. Кейін пойыз құрастырушы, Қаркол станциясы кезекшісі, Опорная станциясы кезекшісі болып тәжірибе жинайды. Гурьев темір жол техникумында, Ақтөбедегі Қазақ қатынас жолдары университетінде сырттай білім алады. 2007 жылы Опорная станциясының тізгінін қолға алып, 2012 жылы денсаулығына байланысты өз еркімен станция кезекшісі жұмысына ауысады. Соңғы бір-екі жыл көлемінде қайтадан станция басшысы қызметіне тағайындалады. Ал оның өмірлік серігі Сания ханым болса Атыраудың тумасы. Мектеп бітірген соң темір жолға жол монтері болып жұмысқа тұрған. Тұрмысқа шыққан соң біраз жыл отағасы мен балаларының күтімін жасап үйде отырады. 2008 жылы Опорная вокзалы аумағын тазалаушы болып НЖС магистральдық желі мекемесіне жұмысқа орналасып, күні бүгінге дейін еңбек етті. Мұртаза аға мен Сания апа зейнетке кетсе де артында тәрбиелеп өсірген ұрпағы теміржолдың болашағы үшін еңбек ете бермек. Екеуінен туған екі ұл мен екі қыздан теміржолшылар да шыққан. Тұңғышы Қуаныш №467 бекет кезекшісі болса, келіні Гүлзада – Опорная станциясында кезекші. Екінші ұлы Аманкелді – сол станцияда байланыс механигі. Зейнет демалысына аттанып бара жатып, теміржолшылардың кәсіби мерекесі қарсаңында «Адал еңбегі үшін» төсбелгісімен марапатталған Мұртаза аға, шын мәнінде, жарты ғасырға жуық теміржолдың дамуына адал тер төкті. Енді ұзақ жылғы бейнетінің зейнетін көрмек.