Түркістан станциясы 9 айда жұмыскерлердің өндірістік жарақат алуына жол берген жоқ
Шымкент қаласы бойынша меншікті тілшісі
Түркістан станциясы үш тоқсанды апатсыз-ақаусыз, өндірістік жарақат алу оқиғаларына жол бермей қорытындылады. Жоспарларды межеге жеткізіп орындай білді. Зиянды, ауыр және қауырт еңбек жағдайларында жұмыс істейтін жұмысшылар тарапынан да ешқандай шағым мен төтенше оқиғалар болған жоқ. Теміржолшылар арнайы жылы киіммен және аяқ киіммен жүз пайыз қамтамасыз етілген.
«Қызметкерлердің санитарлық-тұрмыстық жағдайлары нормалар мен талаптарға сәйкес. Бекеттерде жуынатын бөлмелер, санитарлық тораптар, арнайы киімді кептіру және тамақтану бөлмелері жұмыс істеп тұр, қажетті құрал-жабдықтармен қамтылған, оларға ағымдағы жөндеу жұмыстары жүргізілді», – дейді еңбек қорғау инженері Ләззат Рысбаева.
Айтуынша, пойыздар қозғалысының қауіпсіздігімен тікелей байланысты жауапты қызметкерлердің міндетті жеке медициналық карталарымен қамтылып, міндетті мерзімдік медициналық тексеруден өткен. Ауысым алдындағы медициналық тексеруден өту де тұрақты жолға қойылған. Ауысым сайын қозғалыс жылдамдығын реттеушілер, пойыз құрастырушылар, маневрлік диспетчерлер медициналық тексеруден өтеді. Қызметкерлерді жұмысқа жіберу, олардың медициналық куәландыру нәтижелері бар арнайы кітапша бар. Жүк тасымалының талапқа сай әрі қауіпсіз болуы үшін әрбір теміржолшының кәсіби әзірлігі қажет. Сондықтан, станция басшылары аяқ астынан тексеру кестесіне сәйкес технологиялық процестерді орындау кезінде қызметкерлердің қауіпсіз еңбек тәсілдерін ұстанып, жұмыс орындарында жеке қауіпсіздік техникасын сақтауына және еңбекті қорғау нормаларының қамтамасыз етілуіне бақылау жасап, «Жолда адам» ақпарат жүйесі талаптарының бұзылмауын, қауіпті жұмыс орындарын қоршау, қызметтік өту жолдары мен ескерту белгілерінің бар- жоғын тексерді.
«Осы тексерістер барысында ғимаратты күрделі жөндеу туралы үш ескерту берілді, алайда қаржыға байланысты ол орындалмай тұр. Ал мінез-құлық диалогын өткізу кестесіне сәйкес 34 жеңіл жарақат, 1 ауыр жарақат қаупі анықталды. Осы тәуекелдер бойынша анықталған сәйкессіздіктерді жою, оны түзету іс-қимылдарының жоспары жасалды», – дейді Л.Рысбаева.
Қазір станция ұжымы тамыз айынан желтоқсанның соңына дейін «2021 жылдың екінші жартыжылдығын өлім-жітімсіз өткізу» ұранымен еңбек етуде. Соған орай түрлі еңбек қорғау бойынша іс-шаралар ұйымдастырылып, өткізіліп жатыр екен. Қауіпсіздік айлығы барысында техникалық сабақтар өтіп, қозғалыс шаруашылығында өткен жылы жіберілген жарақат жағдайлары зерттелуде. Сондай-ақ бір жыл, жарты жыл жұмыс өтілі бар жас қызметкерлермен жұмыстың қауіпсіз әдістері бойынша қосымша техникалық сабақтар өткізіліп, оларға нұсқаулықтар, технологиялық процестер жіті түсіндіріліп, үйретілуде. Барлық бекеттерде іс-шараны өткізу туралы аншлагтар және 2021 жылғы жазатайым оқиғалар жөніндегі материалдар «Бұл қайталанбауы тиіс» деген тақырыппен көрнекі жерлерге ілінген. Биыл «Экологиялық мәдениет жылы» болып жарияланғандықтан бұл шарадан Түркістан станциясы да тыс қалмады. «Батарейканы тапсыр – кірпіні құтқар» жобасын іске асыру шеңберінде ғимараттарда істен шыққан батарейкаларды жинау және уақытша сақтау үшін арнайы жәшіктер орнатылды. Оларды жыл соңында әрі қарай қайта өңдеу және кәдеге жарату үшін тиісті орындарға тапсырады. Қалдықтарды шығару да «Түркістан Жарық-Тазалық» ЖШС арқылы уақытылы жүзеге асырылуда.