Жастар станциясының бүгінгі тіршілігі
"Қазақстан теміржолшысы" газетінің Жамбыл облысындағы меншікті тілшісі
Жамбыл теміржолына қарайтын Жастар станциясына жолымыз түсті. Мақсатымыз – санаулы ғана адам еңбек ететін шалғайдағы шағын станция жұмысымен танысу. «Жақсыны көрмек үшін» демекші, өткен жылы осы станцияға жеткізілген модульдік үйдің игілігін теміржолшылар қалай пайдаланып отыр, оны да көзбен көріп қайтпақпыз.
Шу – Мойынты телімінің бойындағы ірі станция Сарышағаннан пойыздан түсіп, әрі қарай автокөлікпен жол тарттық. Екі ортадағы арақашықтық 70 шақырымдай. Арада салынып жатқан «Балқаш-Бурылбайтал» тас жолының кейбір учаскелерінде құрылыс жұмыстары әлі аяқталмаған. Жеңіл көлікпен жүйткіп, тез жетемін дегеннің өзінде әрі-бері бір сағат анық кетеді.
Жастар станциясының бастығы Нұрсұлтан Бөлдеш шағын бекеттің шаруасымен, ауысыммен жұмыс істейтін теміржолшылармен таныстырды. Күнделікті қажеттілігіне қарай 2-3 адам кезекшілікке шығады екен. Жалпы 3 кезекші, 5 механик жұмыс істейді. Олардың көбі Сарышаған секілді жан-жақтағы елдімекендерден қатынайды екен.
– Тұрғын үйлер аз болғандықтан, Жастар станциясына қазір жолаушылар пойызы тоқтамайды. Солтүстік пен оңтүстікке қатынайтын жергілікті пойыздар, №113 «Алматы-Қазан» пойызы ғана тоқтап өтеді. Шағын болса да күрежолдың бойында, қозғалыс қауіпсіздігіне үлкен станциялармен бірдей жауаптымыз. Сондықтан станцияда тәулік бойы кезекшілік ететін теміржолшыларға қолайлы жағдай жасалуы аса маңызды. Бұрын олар жатақханаға барып жататын. Кейін ары-бері қатынау қиындық туғызған соң, станциядан бір бөлмені арнайы жабдықтап бердік. Дәлізге стол қойып, сонда тамақтанатын. Өткен жылы анау тұрған модульдік үй келіп, қазір соның бәрі шешімін тапты, – дейді Нұрсұлтан Бөлдеш.
Жамбыл магистральдық желі бөлімшесі басшылығы былтыр қараша айында алынған үш модульдік үйдің біреуін Сарышаған белгі беру және байланыс дистанциясына беріп, олар өз кезегінде желтоқсан айында оны шалғайдағы осы Жастар станциясына қойыпты. 2022 жылы екеуін алып, олар Навалы мен Көктас станцияларына қойылған болатын.
Біз келгенде сенбі-жексенбіге ауысымға келген кезекші мен электрмеханик модульдік үйдегі орталық су жүйесіне жалғанған бөшкеге су толтырып жатты. Станцияға ауыз су күн сайын тасымалданып жеткізіледі демесеңіз, арнайы ыдысқа құйған соң, әрі қарай бәрі автоматтандырылған. Душтан да, краннан да ыстық-суық су үзілмейді екен.
– Былтырғы желтоқсанда 4 адамға арналған осы модульдік үй келіп, жанымыз кіріп қалды. Шағын ғана болса да ішінде жанға қажеттің бәрі бар. Тоңазытқыш, қысқатолқынды пеш, екі электр пеші, теледидар, қолжуғыш пен душ дейсіз бе, бір сөзбен айтқанда жан шақырып, жағдайымыз жақсарып қалды. Теледидар ютубқа қосылған, интернет байланысы жақсы. Кондиционерге дейін қойып берді. Жаздың аптап ыстығында тіпті рахат болатын болды. Шүкір, теміржолшылардың тұрмыс және еңбек жағдайын жақсартуға кейінгі жылдары көп көңіл бөлініп келеді, біз де міне игілігін көріп отырмыз, – дейді түскі астың қамын жасап жатқан электрмеханик Қадырхан Майбасов.
Әрине, жағдай жайлы болған соң, жұмысқа деген жауапкершілік те, ынта да басқаша болады. Теміржолшылар аз уақыт ішінде «өз үй – өлең төсегіне» айналып үлгерген осы бір ұядай үйге көңіл бөліп, ауыстырып ұстайтын 8 төсек-орын мен ас үй жабдықтарын таза ұстауға тырысады.
Сарышаған белгі беру және байланыс дистанциясының бас инженері Мақсат Исаев былтыр қараша айының соңында үш модульдік үй жеткізілгенін айтты. «Біреуінің құны 9,5 миллион теңгені құрайды. Шағын, қолайлы да жайлы үй. Ішінде керектінің бәрі бар. Биыл алған үшеудің бірін осы Жастарға бердік, қалған екеуін де дайындап қойдық. Оларды Шешенқара, Ақжолтай станцияларына орнататын боламыз», – дейді Мақсат Сейдалыұлы.