Шиелі станциясы: пандемия кедергі емес

Қызылорда ЖТ бөлімшесінің Шиелі станциясы аймақтағы эпидемиялық ахуалдың тұрақсыздығына қарамастан өнімді жұмыс жасауда. Жыл басынан бері пойыздық, маневрлік жұмыстар кезінде және кірме жолдарда жылжымалы құрамдардың қозғалыс қауіпсіздігінің бұзылуына жол берілмеген. Станция бастығының орынбасары Нұрғали Әбжаппаровтың мәліметінше, станция теміржолшылары өткен бес айда 3010 вагонға 208821 тонна жүк тиеп, өндірістік жұмыс жоспарын толық орындаған. Сондай-ақ, 52 пойыздан 2677 вагонды ажыратып, 64 пойызға 2767 вагонды тіркеген. Аса қауіпті аймақ саналатын теміржол бойындағы өндірістік, маневрлік жұмыстарда сақтық пен қауіпсіздік те қатаң сақталған. Станция басшылығы әрбір ауысым алдында және бекітілген жүйе бойынша техникалық сабақтар мен пысықтау инструктаждарын тұрақты жүргізіп, бақылау, тексеру жұмыстарын талапқа сай жүргізеді. Осылайша жұмыс көрсеткіштерін жыл басынан бергі бес ай ішінде 83 пен 239 пайыз деңгейінде орындаған шиелілік теміржолшылар әлемдік пандемияға байланысты кейбір көрсеткіштер межеге жетпей жатса да, жалпы жұмыс үдерісі қалыпты екенін айтады. – Бұл жерде жүк вагондарының құжаттарын рәсімдеу кезіндегі бос тұру жоспарының 83 пайызбен нәтижеленуін алдағы уақытта жетілдіріп, межеге жеткізуге күш салатын боламыз. Жалпы станция теміржолшыларының бәрі өз кәсібін жан-жақты игерген, сенімді жұмыс жасайтын кәсіби мамандар саналады. Бәрі де тәжірибелі мамандар, дегенмен олардың арасында станция кезекшісі У.Смайлов, пойыз құрастырушы И.Қарамырзаев, станция кезекшісі жанындағы оператор С.Абдиев сынды станцияның жүгін көтерер теміржолшыларды мақтан тұтамыз, – деді станция бастығының орынбасары Нұрғали Әбжаппаров.