Қытай Моңғолиямен шекарада жаңа теміржол желісінің құрылысын бастады
Қытай Баяннұр өңіріндегі Ганкимаоду/Гашуун-Сухайт шекара өткеліне қарай жаңа теміржол желісінің құрылысын бастады. Бұл жоба Моңғолияның оңтүстігімен көлік байланысын күшейтуді көздейді, деп хабарлайды Rail-news.kz.
Құрылыс жұмыстары Қытай аумағын Моңғолиядағы ең ірі көмір кен орны — Таван-Толгоймен байланыстыратын учаскеде жүргізілуде. Бұл жерде кокстелетін және энергетикалық көмірдің мол қоры шоғырланған, ал ол өнеркәсіпте жоғары сұранысқа ие.
2022 жылы Моңғолия Таван-Толгой мен Гашуун-Сухайтты жалғайтын 258 шақырымдық кең табанды теміржол желісінің құрылысын аяқтаған болатын. Бұл желі Қытаймен теміржол жүйесін интеграциялауға негіз қалады.
Қытай аумағындағы жобаны елдегі көмірден энергия өндіру бойынша көшбасшы — China Energy Investment (CHN Energy) корпорациясы жүзеге асыруда. Құрылысты 2027 жылдың басында аяқтау жоспарланған.
Бұл жаңа желі екі ел арасындағы екінші теміржол бағыты болады. Алғашқы бағыт — Эрэн-Хото мен Замын-Үүд арасындағы жол — 1956 жылдан бері жұмыс істеп келеді.
Жаңа жоба қос ел үшін де стратегиялық маңызға ие. Ол Моңғолияның экспорттық арналарын нығайтып, Қытайға көмір жеткізудің тұрақтылығын арттырады.
Жаңа теміржол желісінің жылдық өткізу қабілеті 30 миллион тоннаға дейін жетеді деп жоспарланған. Бұл қосымша логистикалық мүмкіндіктер туғызып, Моңғолияның экспорттық әлеуетін күшейтеді.
Мамандардың болжамынша, Моңғолиядан Қытайға көмір жеткізу көлемі жылына 165 миллион тоннаға дейін өсуі мүмкін. Жаңа теміржол аймақтық сауданың дамуына елеулі үлес қоспақ.