Сауд Арабиясына арналған пойыздарға Rolls-Royce қозғалтқыштары салынбақ
Rolls-Royce компаниясы Сауд Арабиясына арналған пойыздар үшін 50 дизель қозғалтқышына тапсырыс алды, деп хабарлайды Rail-news.kz.
Stadler компаниясы Сауд Арабиясы үшін салып жатқан пойыздар үшін Rolls-Royce компаниясына 12V 4000 R64 mtu маркалы 50 дизель қозғалтқышын жеткізуге тапсырыс берді. Бұл қозғалтқыштар Эд-Даммам – Эр-Рияд бағытына қатынайтын, сағатына 200 км жылдамдықпен жүре алатын он дизель-пойызға орнатылады.
Stadler мен Сауд Арабиясының мемлекеттік теміржол компаниясы SAR қозғалтқыштарды жеткізу және техникалық қызмет көрсету жөніндегі келісімшартты 2024 жылдың ақпан айының басында жасаған. Қызметке берілмес бұрын төрт пойыз Еуропада және Сауд Арабиясында жан-жақты сынақтан өтеді.
Мtu брендімен шығарылатын 4000 сериялы дизельдер ауыр жағдайларда жұмыс істей алатынан бұрыннан дәлелдеген. 2012 жылдан бері Сауд Арабиясының теміржолдарында орнатылған 12V 4000 маркалы 70-тен астам қозғалтқыш 50 °C-тан жоғары температурада, құм мен шаң әсерінде үздіксіз жұмыс істеп келеді.
Жаңа қозғалтқыштар экологиялық талаптарға, энергия тиімділігіне және пайдаланудағы сенімділікке сай. Шығарындылар деңгейі бойынша олар Еуропаның Stage V нормаларына сәйкес келеді.
Әр пойыз екі моторлы вагонға орналастырылған қуаты 1500 кВт төрт дизельмен жабдықталады. Тағы 10 қозғалтқыш қосалқы моторлы вагондарға орнатуға және жөндеуге жіберілген қозғалтқыштарды ауыстыруға арналған. Rolls-Royce пен Stadler арасындағы келісімшартта тағы 10 пойызға арналған 40 қозғалтқышты жеткізуге опцион қарастырылған.