Жапонияда 30 жыл ішінде 1300 шақырымнан астам теміржол жабылған
Жапонияның Жер, инфрақұрылым, көлік және туризм министрлігінің (MLIT) мәліметінше, елдегі демографиялық дағдарысқа байланысты 1996 жылдан 2025 жылына дейінгі аралықта жалпы ұзындығы 1366 шақырымды құрайтын 68 теміржол учаскесі пайдаланудан шығарылған, деп хабарлайды Rail-news.kz.
Бұл көрсеткішке Жапон архипелагының ең солтүстік аралы Хоккайдодағы теміржол желісінің үштен бірі еніп отыр. Атап айтқанда, бір жергілікті оператор ұзындығы 140 шақырымдық бағытқа қызмет көрсетуден бас тартса, тағы бір компания 116 шақырымдық желідегі тасымалды тоқтатқан.
Теміржол учаскелерінің жабылу қарқынының үдеп бара жатқаны ерекше атап өтілді:
Бірінші онжылдықта (1996 жылдан бастап) – 387 шақырым;
Екінші онжылдықта – 445 шақырым;
Үшінші онжылдықта – 534 шақырым жабылды.
Жалпы 1366 шақырымның 680 шақырымы Ұлттық теміржол (JNR) жекешелендірілгеннен кейін құрылған жеке компаниялардың үлесіне тиесілі.
Теміржол қатынасынан бас тарту негізінен халық саны тұрақты түрде азайып жатқан аймақтарда орын алды. Бұл үрдіс Жапонияның ауылдық жерлеріндегі көліктік қызмет көрсету деңгейінің төмендеуіне әкеп соқтыруда.
Сонымен қатар, қарастырылып отырған 30 жылдық кезеңде елде 1913 шақырым жаңа теміржол салынды, оның ішінде 1156 шақырымы «Синкансэн» жоғары жылдамдықты желілері.