ЕҚДБ Өзбекстан темір жолын цифрландыруға 38,4 млн еуро бөледі

Еуропалық қайта құру және даму банкі (ЕҚДБ) Өзбекстанның көлік-логистикалық әлеуетін арттыру мақсатында «Өзбекстан темір жолдары» (ӨТЖ) ұлттық операторының цифрлық трансформациясын қолдауға шешім қабылдады деп хабарлайды Rail-news.kz.

Банк бұл бағыттағы мемлекеттік секторға арналған алғашқы ауқымды жобасы аясында ӨТЖ компаниясына 38,4 миллион еуроға дейін несие бөлмек. Ресми мәліметке сүйенсек, қазіргі уақытта аталған компания елдегі ұзындығы 6 950 шақырымды құрайтын теміржол желісін басқарады және ұлттық жүк тасымалының 40%-на жауапты.

Бөлінген қаражат ескірген механикалық (қолмен атқарылатын) жұмыстарды толықтай заманауи цифрлық жүйелерге ауыстыруға жұмсалады. Нәтижесінде диспетчерлік қызмет, жоспарлау және жедел басқару жүйелері автоматтандырылады.

Теміржол қозғалысын тиімді басқару үшін жаңа бағдарламалық қамтамасыз ету енгізіліп, киберқауіпсіздік жүйелері озық халықаралық тәжірибеге сай жаңғыртылады.

Бұл реформа Өзбекстан ішіндегі тасымалды жақсартып қана қоймай, Транскаспий халықаралық көлік дәлізі бойындағы жүк және жолаушылар ағынының кедергісіз әрі жылдам өтуін қамтамасыз етеді деп күтілуде.

Бүгінде ЕҚДБ Өзбекстанға 210 жоба аясында шамамен 6,9 млрд АҚШ долларын (6 млрд еуро) инвестициялаған. Осы көрсеткіштің арқасында Өзбекстан соңғы алты жыл бойы Орталық Азия өңірінде ЕҚДБ-дан ең көп қаржыландыру алатын көшбасшы мемлекет болып қала бермек.