Трансауған магистралінің құрылысы 2027 жылы басталуы мүмкін
Трансауған теміржолының құрылысы 2027 жылдың екінші жартысында басталуы мүмкін. Бұл туралы Өзбекстан Көлік министрінің орынбасары Жасурбек Чориев мәлімдеді деп хабарлайды Rail-news.kz.
Болашағы зор бұл магистраль Ауғанстанды Пәкістанмен және оның Араб теңізіндегі порттарымен байланыстырып қана қоймай, Орталық Азия елдері үшін теңіз жолдарына шығатын ең қысқа бағытқа айналмақ. Сонымен қатар, Трансауған теміржолы жоспарланып отырған БРҚӨАП (Беларусь – Ресей – Қазақстан – Өзбекстан – Ауғанстан – Пәкістан) көлік дәлізінің бір бөлігі ретінде қарастырылуда.
Ашық дереккөздердегі мәліметтерге сүйенсек, жолды ең қысқа қашықтық — «Термез – Мазари-Шариф – Кабул – Пешавар» (649 км) маршруты бойынша салу ұйғарылған. Құрылыс құны 7 миллиард долларға бағаланып отыр, бұл бастапқы болжамнан (4,8 млрд доллар) едәуір жоғары. Есептеулер бойынша, жолдың тегіс жазықтықтағы бір шақырымының орташа бағасы 4 миллион долларды құраса, таулы аймақтарда бұл көрсеткіш 10 миллион долларға жетеді. Жасурбек Чориевтің айтуынша, құрылысқа Біріккен Араб Әмірліктері, Катар және Қазақстанның шетелдік инвесторлары қызығушылық танытып отыр.
Алайда, қазіргі жағдайда жобаны жүзеге асыруға екі нәрсе кедергі, дейді «Logistan» порталының бас редакторы Григорий Михайлов. Біріншісі — қаржыландыру көзі әлі белгісіз. Екіншісі — халықаралық жағдай. Трансауған магистралі болашақта Өзбекстан, Ауғанстан және Пәкістанды өзара байланыстыруы тиіс.
«Ауғанстан мен Пәкістан бір-біріне бомба мен зымыран жаудырып жатқанда теміржол салу қиын. Алдымен шекарадағы жағдайды реттеп, өзара іс-қимылды жолға қойып алу керек, ал құрылысты содан кейін ғана бастаған жөн», — деп атап өтті сарапшы.