Ашылғанына 5 жыл болған «Боржақты-Ерсай» теміржолы жүк тасымалын еселей түсті
«Қазақстан теміржолшысы» газетінің тілшісі
Еліміздің транзиттік әлеуетін сан еселеп арттыратын Құрық порты жылына 4 млн тоннаға дейін жүк жөнелте алады. Ал осы портқа жан-жақтан келетін жүктерді жеткізу үшін «Нұрлы жол» бағдарламасы аясында 2014 жылы құрылысы басталып, 2016 жылы ашылған «Боржақты-Ерсай» теміржолы – небары 14 шақырымды құраса да экономикалық тиімділігі жоғары бағаланған жоба. Бүгінде Шығыс-Батыс көлік дәлізінің негізгі бөлігіне айналған теміржол Құрық портын негізгі магистральмен байланыстырады. Маңғыстау-Өзен теміржолымен түйістіретін теміржолдың басы – Маңғыстау станциясынан бағыт алатын «Р» бекеті мен Ералы станциясы теміржолының аралығында жатқан Боржақты станциясы. Ал екінші шеті – Ерсай станциясы Құрық портында орналасқан. Қазақстанның қуатты халықаралық портына айналады деп үміт күтіп отырған Құрық портын дамытудың ауқымды жоспарындағы ең маңызды жоба. Жаңа темір жол желісі алғашқы бес жылдың ішінде жылына 8 млн тоннадан астам жүк тасымалын қамтамасыз етеді деп болжанған, себебі ол Құрық порты ауданындағы кеме жасау және кеме жөндеу зауыты, металл конструкцияларының зауыты сияқты дамып келе жатқан өндірістерге көліктік қызмет көрсетеді.
Құрық портының арнайы сайтындағы мәліметтерге жүгінсек, биыл жылдың алғашқы 4 айында порт арқылы жүктерді өткізу көлемі 260 мың тоннаны құраған. Бұл туралы «ҚТЖ» ҰК» АҚ басқарма төрағасы Нұрлан Сауранбаев аталған порттың жұмысымен танысуға барған кезде айтылды. Компания басшысы Қазақстанның көлік қызметтері бойынша еуразиялық нарықтағы транзиттік мемлекет ретінде бәсекеге қабілеттілігін арттыру үшін портты одан әрі дамыту керектігін жеткізген. Мәліметтерге көз жүгіртсек, порт арқылы былтыр 785 330 тонна жүк экспортталған. Сондай-ақ өткен жылы 1,56 млн тонна жүк тиеліп, түсірілген. Боржақты және Ерсай станцияларында пойыздар қозғалысының қауіпсіздігі жоғары деңгейде қамтамасыз етілген. Бағдаршам ашылмай қалған жағдайда бұрма тұйықталуын қамтамасыз ету үшін электрлік орталықтандыру құрылғылары енгізілген, ДХ-500 аппаратурасы қондырылған. Сол арқылы бекет аралық, пойыз радиобайланысы, энергодиспетчерлік байланыс және электромеханиктердің қызмет байланысы жүзеге асырылып отыр.
Боржақты-Ерсай телімінің пайдалануға берілуі – жаңа жұмыс көздерін ашып қана қоймай, Құрық портының жандануына ықпал етіп, болашақтың игілігіне қызмет етуде. Оны салуға 250 жұмысшы жұмылдырылса, салынып біткеннен кейін осы жолдың бойында 52 жаңа жұмыс орны ашылды. Қазақстан үшін екінші теңіз қақпасы Құрық порты бой көтерсе, Боржақты-Ерсай бойымен Еуропа жүктері жеткізіліп, көк теңіз арқылы әлем елдерінің тауарлары тасымалдануда. Бүгінде осы темір жол арқылы жүктер үздіксіз жеткізіліп жатқан Құрық порты Еуропа мен Қытайдың арасын қосатын үлкен трансқұрлықтық маңызы бар тасымалдау портына айналды.