Астанада бір слесарлар бригадасы оншақты тепловозға қызмет көрсетеді

Локомотив пайдалану деполарында ТҚК-2 сервисін көрсететін слесарьларды тепловоздардың «жан дүниесін» танитын мамандар десе болады. Олар ақауды анықтаумен қатар ұсақ-түйектерін өздері жөндей береді. Сондай қызметтің басы-қасында жүрген тәжірибелі теміржолшылардың бірі – Астана локомотив пайдалану депосының ТҚК-2 ауысым шебері Марат Нұрмағанбетов.

Петропавлда туғанмен елордада теміржол колледжінде білім алып, қазіргі қосында алғаш еңбек жолын слесарь болып бастаған Марат Нұрмағанбетовтің салада жұмыс істеп келе жатқанына биыл 14 жыл. Қарамағындағы 15 шақты слесарьдің жұмысын қадағалап, күніне цехқа «қаралуға» келетін локомотивтердің, соның ішінде негізінен электровоздардың ақауын анықтауда ол ауысыммен жұмыс жүргізеді. Бүгінгі деңгейге жеткенге дейін слесарь ретінде тепловоздардың құрылысын үйреніп, саланы терең меңгерген ол 2015 жылы бригадир болып тағайындалды.

– Біздің жұмыстың ретіне келсек, алып техниканың тежегіш қалпын ауыстырамыз, құм құямыз, майын жаңартамыз, сосын аппарат жағынан, контакт бойынша құрылғыларды тазалап, автоматтардың да ақауы болмауын қадағалаймыз, тартым қозғалтқышын, тағы да басқа бөліктерді қараймыз, күрделі ақау шықса, ТҚК-3,4 сияқты басқа күрделі жөндеу цехтарына акт толтырып, жібереміз. Цехқа күніне шамамен кезекті рейске шыққалы тұрған 10 шақты тепловоз кіреді. Барлық жұмыстың нәтижесі бойынша ауысым соңында депо бастығына есеп береміз. Жұмысымды аса қиын деп айта алмаймын, ал жауапкершілік өте жоғары. Сәйкесінше, жұмыс беруші тарапынан да бізге барлық еңбек жағдайы жасалған, зиянды жұмыс болғандықтан, сүт беріледі, киімдеріміз түгел, жуынып-шайынатын, тамақтанатын орындарымыз керек-жарақпен жабдықталған, – дейді ол.

Теміржолшылар отбасынан шыққан кейіпкеріміз әке-шешесінің жолын қуып, теміржолшы болғанына еш өкінбейді. Өйткені, өз кәсібін жақсы көреді және шебер меңгерген. Оның еңбегі елеусіз қалмай, талай рет құрмет грамоталарымен және алғыс хаттармен марапатталған.