Шымкенттегі оқушыларға ереже бұзған жағдайда айыппұл төлейтіні ескертілді

«Темір жол – қауіптілігі жоғары аймақ» тақырыбында мектептерде оқушылармен және Шымкент станциясының болат жол бойындағы тұрғындармен түсіндіру жұмыстары жүргізілді.

Шымкент қаласының В.Терешкова атындағы №31 мектебінде өткен кездесуге Шымкент станциясындағы желілік полиция бөлімінің, ӘТЖК мекемесінің өкілдері және Шымкент станциясындағы еңбек қорғау инженері және 60-тан астам оқушы мен оқытушылар қатысты. Балаларға темір жолдың қауіпті аймақ екенін және теміржол көлігінде қауіпсіздік шараларын сақтауға қатысты мультфильм көрсетілді. Сондай-ақ, темір жол арқылы өту ережелері көрсетілген буклеттер таратылды. Жиында сөз алған Шымкент станциясының еңбек қорғау жөніндегі жетекші инженерінің міндетін атқарушы Арман Өтебаева 2022 жылдың 16 мамыр-16 маусым аралығында «Темір жол – қауіптілігі жоғары аймақ» айлығы жарияланғанын және оның шеңберінде балалардың жарақаттануының алдын алу үшін оқушылар арасында түсіндіру жұмыстары жүргізіліп отырғанын атап өтті.

  – Балалар кейде вагонға шығып, сырғанамақ болады. Ал оның салдары неге әкелетінін түсініп жатпайды. Байланыс желілерінің сымдарында кернеу өте жоғары, 27500 вольтқа дейін. Токқа түсіп, қаза тапқан жағдайлар да болды. Сонымен қатар кейбір адамдар тоқтап тұрған вагоннан қауіп келмес деп, оның астынан өтіп жатады. Шын мәнінде, станцияда тұрған әр вагон жұмыс үстінде. Ол кез келген секундта қозғалуы мүмкін. Теміржолшыларды алаңдатып отырған келесі бір мәселе – жастардың құлаққап киіп алып, музыка тыңдап, темір жолды кесіп өтуі. Тіпті, олар пойыздың дабылын да естімейді, басты назары рельсті кесіп өтуге бағытталған. Ал дұрысында, темір жолды арнайы бөлінген жерлерден кесіп өту керек, – дейді Арман Өтебаева.  

Бұдан кейін сөз алған ӘТЖК және ЖПБ ППВ өкілдері де балаларды қауіпті аймақта жүргенде қауіпсіздік ережелерін сақтауға шақырды. Полиция капитаны Б.Әбдіраманов жолаушылар вагондарының терезе әйнегін сындырып, бұзақылық жасаған жағдайда 200 АЕК, темір жолды белгіленбеген жерлерден кесіп өткенде ҚР Әкімшілік құқықбұзушылық кодексіне сәйкес 3 АЕК салынатынын, 16 жасқа дейінгі балалардың бұзақылығы және ереже бұзушылығы үшін ата-аналары жауапкершілікке тартылатынын мәлімдеді.  

«Тексеру барысындағы барлық бұзушылық республикамыздың бірыңғай базасына енгізіледі. Айыппұл санкциялары төленбеген жағдайда ата-аналардың төлем карточкалары бұғатталып, шетелге шығуға тыйым салынады. Сондай-ақ, сағат 23.00-ден кейін ата-анасыз көшеде жүруге болмайды», – деп сөзін түйіндеді құқық саласының өкілі.  

Ал тұрғындармен кездесу барысында құзырлы орган өкілдері ата-аналарға балалардың бос уақытын болат жол бойында өткізбеуін қадағалауға алуды, олардың іс-әрекетіне жауапсыздық танытпауды тапсырды. Шымкент станциясының еңбек қорғау жөніндегі жетекші инженерінің міндетін атқарушы Арман Өтебаеваның айтуынша, 2022 жылдың 4 айында Шымкент бөлімшесі бойынша жүк пойызының адамды басып кетуінің 4 оқиғасы тіркелген. 

«Тұрғындар бұл заңбұзушылыққа өздері жауапты болатынын білмей, теміржолға малын жіберетін жағдайлар да бар. Әкімшілік құқық бұзушылық туралы кодексте 559-баптың 1-тармағында мал иесіне 5 АЕК көлемінде айыппұл салынады. Сондықтан ересек адамдардан балаларына да, малға да ие болып, қауіпсіздік ережесін сақтауға шақырамыз», – деп түйіндеді сөзін теміржолшы.