Сырдария арқылы өтетін жарты шақырымдық теміржол көпірі салынады
Дарбаза – Мақтаарал теміржол желісін салу ауқымды жобасы аясында Сырдария өзені арқылы көпір салуға қатысты дайындық жұмыстары басталды, деп хабарлайды Rail-news.kz.
Көпірдің ұзындығы 500 метрді құрайды. Қазіргі уақытта құрылыс алаңын дайындау және техниканы жұмылдыру жүргізілуде.
Ұзындығы 152 км жаңа тармақ салу бойынша белсенді жұмыстар Ердаут станциясынан Сырдария өзенінің жайылмасына дейінгі учаскеде жүргізілуде. Қазірдің өзінде 6 миллион текше метрден астам жер төсемі құйылды, бұл жалпы көлемнің 50% құрайды. Сонымен қатар, жасанды құрылыстарды монтаждау жүргізілуде: жоба аясында барлығы 35 көпір салу және 135 құбыр орнату жоспарлануда. Арыс станциясында 105 км рельсті шпалдық тор жиналып, төсеуге дайын. Құрылысқа 600-ден астам адам және 300-ден астам техника жұмылдырылған.
Жоба Қазақстан Республикасы Президентінің тапсырмасы бойынша жүзеге асырылуда және елдің көлік-транзиттік әлеуетін дамыту үшін стратегиялық маңызы бар. Жаңа теміржол тармағы шамадан тыс жүктелген Сарыағаш – Ташкент учаскесінің, сондай-ақ Сарыағаш шекара маңы станциясының жүктемесін азайтуға мүмкіндік береді, бұл Орталық Азия елдері бағытында экспорттық тасымалдарды ұлғайту үшін жағдай жасайды.
Сонымен қатар, жоба Түркістан облысының әлеуметтік-экономикалық дамуына ықпал ететін болады. Жаңа желі Өзбекстан аумағы арқылы өту қажеттілігін болдырмай, шалғайдағы Мақтаарал және Жетісай аудандарын Қазақстан темір жолдарының негізгі желісімен байланыстырады.
ҚТЖ темір жолының құрылысын 2026 жылы аяқтау жоспарлануда.