ҚТЖ «Нұрлы Жол – Семей» бағытындағы пойызды жаңа вагондармен толықтырды
17 наурыздан бастап №353/354 «Нұрлы Жол – Семей» бағыты бойынша қатынайтын пойыз құрамына RWS Wagon компаниясының жаңа вагондары енгізіледі. Жаңартылған вагондар жолаушыларға жол жүру кезінде барынша жайлы жағдай жасауға бағытталған. Пойыз құрамы 9 вагоннан тұрады: 3 купелік, 5 плацкарт және 1 штабтық вагон. Бір бағытта пойыз 350-ден астам жолаушыны тасымалдауға мүмкіндік береді, деп хабарлайды Rail-news.kz.
Пойыз күнара қатынайды. «Нұрлы Жол» станциясынан 17:55-те, ал Семей станциясынан 16:45-те жөнелтіледі.
Бұған дейін аталған бағытта 1993 жылы шығарылған вагондар қолданылған. Қазіргі уақытта пойыз құрамы жаңа буындағы заманауи вагондармен жаңартылды.
Жаңа вагондар дизайн, қауіпсіздік және жайлылық бойынша халықаралық талаптарға сәйкес жасалған. Купелерде эргономикалық ұйықтайтын орындар, жеке жарықдиодты шамдар, USB-порттар және электр желісіне арналған розеткалар орнатылған. Мүмкіндігі шектеулі жолаушылар үшін арнайы купелер мен арбаға арналған орындар, сондай-ақ, жолсерікті шақыру батырмасы қарастырылған. Вагондардың қызмет ету мерзімі 40 жылға дейін.
Соңғы екі жыл ішінде «Жолаушылар тасымалы» АҚ RWS Wagon (ЗИКСТО) өндірісінің 219 вагонын сатып алды. Жаңа вагондар сондай-ақ, «Ақтөбе – Атырау», «Павлодар – Түркістан», «Павлодар – Алматы», «Қызылорда – Семей», «Алматы – Саратов», «Алматы – Өскемен», «Астана – Көкшетау», «Астана – Бурабай курорты», «Қарағанды – Астана» бағыттарында да қатынауда.
Вагон паркін жаңарту Мемлекет басшысының тапсырмасы аясында Ұлттық тасымалдаушының негізгі стратегиялық бағыттарының бірі саналады. 2030 жылға дейінгі жаңғырту бағдарламасы шеңберінде жолаушылар вагондары толықтай жаңартылады.
Анықтама:
Техникалық сипаттамалары мен мүмкіндіктері. RWS Wagon (ЖШС «ЗИКСТО») компаниясы шығарған барлық вагондар 45-серияға жатады және жолаушылардың сапары кезінде жайлылық пен қауіпсіздікті қамтамасыз ететін заманауи жабдықтармен өндірілген. Бұл вагондар мүмкіндігі шектеулі жандарға, балалы отбасыларға, егде жастағы жолаушыларға және халықаралық туристерге қолайлы болатындай етіп бейімделген. Кедергісіз қолжетімділік жүйесі мүгедектер арбасын пайдаланатын жолаушылардың вагонға бөгде көмексіз кіруіне мүмкіндік береді. Балалы отбасылардың ыңғайы үшін санитарлық тораптарда нәрестенің жөргегін ауыстыруға арналған арнайы үстелдер қарастырылған. Вагондарда Wi-Fi желісі және әр орынның жанында орналасқан USB-розеткалар жолаушыларға байланыста болып, оқу, жұмыс істеу немесе демалу кезінде құрылғыларын оңай қуаттауға мүмкіндік береді. Әрбір сөренің жанында орнатылған эргономикалық тұтқалар, тамбурлардағы жарықдиодты жарықтандыру, сондай-ақ, әр купеде температураны жеке реттеу мүмкіндігі сапар барысында жоғары деңгейдегі жайлылықты қамтамасыз етеді. Сондай-ақ, жолаушылардың бағалы заттарын сақтауға арналған жеке сейфтер қарастырылған. Вагондардың ішкі әрлеуі экологиялық таза, гипоаллергенді материалдардан жасалған. Ал ауаны залалсыздандыру жүйесі инфекциялардың таралу қаупін төмендетуге ықпал етеді. Әрбір штабтық вагонда мүмкіндігі шектеулі жолаушыларға арналған кеңейтілген арнайы купе және санитарлық торап бар. Тамбур мен салон арасындағы батырма арқылы басқарылатын жылжымалы есіктер кеңістікті үнемдеп, шуды азайтады және пайдалануға ыңғайлы. Герметикалық вагон аралық өткелдер құрам ішінде тұрақты микроклиматты сақтауға мүмкіндік беріп, жолаушылардың вагондар арасында еркін қозғалуын қамтамасыз етеді. Вагондар әртүрлі температуралық жағдайларда жұмыс істеуге бейімделген, ал вакуумды әжетханалар пойыз ұзақ уақыт тоқтап тұрған кезде де қызметін жалғастырады. Ақпараттық таблоларда мәліметтер қазақ, орыс және ағылшын тілдерінде көрсетіледі. Ал вагон арбашалары қозғалыстың жұмсақ әрі бірқалыпты болуын қамтамасыз етеді.