Теміржол вокзалында балалар қауіпсіздігіне арналған түсіндіру жұмыстары жүргізілді
Көліктегі полиция департаментінің қызмет көрсету аумағында «Заң мен тәртіп – қауіпсіз балалық шақтың кепілі» республикалық акциясы аясында «Жасөспірім» жедел-профилактикалық іс-шарасы өтті, деп хабарлайды Rail-news.kz.
Іс-шараның мақсаты – кәмелетке толмағандар арасындағы құқық бұзушылықтардың алдын алу, олардың құқықтарын қорғау және теміржол көлігі нысандарында қауіпсіздікті қамтамасыз ету. Осы кезеңде көлік полицейлері вокзалдарда, перрондарда және жолаушылар пойыздарында ауқымды түсіндіру жұмыстарын жүргізді. Ерекше назар жасөспірімдердің қадағалаусыз қалуының алдын алуға, көлік нысандарындағы жарақаттану тәуекелдерін болдырмауға және олардың заңға құрметпен қарау мәдениетін қалыптастыруға аударылды.
Іс-шара барысында жарыстарға қатысу үшін жолға шыққан 2000-нан астам кәмелетке толмаған спортшының қауіпсіздігі қамтамасыз етілді. Желілік полиция бөліністеріне 74 жасөспірім жеткізілді. Оның ішінде 33-і әкімшілік жауапкершілікке тартылса, 41-і заңды өкілдерінің еріп жүруінсіз жүргені үшін анықталды. Үш кәмелетке толмаған бала бейімдеу орталықтарына орналастырылды. Сонымен қатар, балалардың түнгі уақытта тұрғын үйден тыс жерде болуына жол бергені үшін 41 ата-ана әкімшілік жауапкершілікке тартылды. Тағы 2 ата-ана кәмелетке толмағандарды тәрбиелеу және олардың қауіпсіздігін қамтамасыз ету жөніндегі міндеттерін тиісінше орындамағаны үшін жауапқа тартылды.
Білім беру ұйымдарында құқықтық бағыттағы 55 профилактикалық іс-шара, оның ішінде дәрістер мен брифингтер өткізілді.
«Біздің негізгі мақсатымыз – жазалау емес, құқық бұзушылықтардың алдын алу. Жасөспірімге дер кезінде көңіл бөліп, оны ойланбай жасалатын әрекеттерден және көлік нысандарында туындауы мүмкін қауіп-қатерлерден сақтау аса маңызды. Балалардың қауіпсіздігі ең алдымен ата-аналардың жауапкершілігі мен белсенді қатысуына байланысты», – деп атап өтті Көліктегі ПД ӘПБ бөлімінің бастығы Алихан Жұмажанов.
Көлік нысандарында кәмелетке толмағандардың қауіпсіздігін қамтамасыз ету бағытындағы жұмыстар алдағы уақытта да жүйелі түрде жалғасын табады.