Жыл басынан бері 24 адам пойыз астына түскен
2026 жылдың басынан бері Көліктегі полиция департаментінің қызметкерлері теміржолдарды белгіленбеген жерлерден кесіп өткені үшін 22 376 азаматты жауапкершілікке тартты. Мұндай құқық бұзушылықтар теміржол көлігі нысандарындағы жазатайым оқиғалардың негізгі себептерінің бірі болып қалып отыр, деп хабарлайды Rail-news.kz.
Төтенше жағдайлардың алдын алу мақсатында көлік полицейлері теміржол ұйымдарының өкілдерімен бірлесіп, халық арасында тұрақты түрде профилактикалық рейдтер мен ақпараттық-түсіндіру жұмыстарын жүргізуде.
Қабылданып жатқан шараларға қарамастан, азаматтардың жарақат алу жағдайлары әлі де тіркелуде. Есепті кезеңде пойыз астына 24 адам түсіп, олардың жартысынан астамы көз жұмды. Өкінішке қарай, зардап шеккендердің арасында кәмелетке толмағандар да бар.
Оқиғалардың негізгі себептері қарапайым қауіпсіздік талаптарын өрескел елемеу, теміржолдарды белгіленбеген жерлерден кесіп өту, сондай-ақ аса қауіпті аймақта мас күйінде жүру.
Тек өткен демалыс күндері Алматы, Түркістан, Қарағанды-Сұрыптау және Тараз станцияларында төрт қауіпті оқиға тіркелді. Барлық жағдайда азаматтар теміржолдарды арнайы белгіленген өткелдерден тыс жерлермен кесіп өткен. Құқық бұзушылар заңнамаға сәйкес жауапкершілікке тартылды.
Жазғы демалыстың басталуына байланысты Көліктегі полиция департаменті ата-аналар мен балаларды теміржол көлігі нысандарында қауіпсіздік қағидаларын қатаң сақтауға шақырады. Балаларды теміржолдардың маңында қараусыз қалдыруға болмайды. Бұл олардың өмірі мен денсаулығына ғана емес, айналасындағыларға да қауіп төндіреді.