Қызылордалық теміржолшылар финалға жолдама алды
Қызылорда облысы бойынша меншікті тілші
Қызылорда ЖТ бөлімшесі теміржолшыларының алты құрама командасы футболдан өзара іріктеу турын өткізді. Бұл жыл сайын теміржол мекемелері арасында өткізілетін аймақтық турдың ақтық сыны болатын.
Бұған дейін бөлімшенің Сексеуіл, Қазалы станцияларында өткізіліп, сол додалардан оза шауып бәйге алған саңлақтардың ақтық сынына нүкте қойылып, аймақтық турға берілетін жалғыз жолдаманы Қызылорда локомотив пайдалану депосының «ТЧЭ-34» құрамасы қанжығаға байлады. Олар іріктеу турда барлық құрама командадан шеберлік техникасы мен айласын асырып, айқын басымдықпен жеңіске жетті.
– Жыл сайын теміржолшылар арасында өткізілетін футбол турнирінің 3-іріктеу кезеңін өткізіп, жолдаманы үш турдың ең үздігі деп танылған «ТЧЭ-34» құрамасына берілді. Енді алдағы күндері оңтүстік аймақ теміржолшыларының, яғни Шымкент, Тараз және Қызылорда ЖТ бөлімшелерінің футбол құрамалары осы біздің бөлімшеде бас қосып, тағы бақ сынайтын болады. Осы ойында бас жүлдені еншілеген команда 4 қыркүйекте Қарағанды қаласында өтетін жарысқа қатысады. Біз өткен жолғы Қостанайда өткен турнирде жүлделі орын алғанмен қарағандылық әріптестерімізге есе жіберіп алған едік, осы жолы олардан басым түссек деген ойдамыз, – дейді Қызылорда ЖТ бөлімшесінің кәсіподақ ұйымының төрағасы Мұхтар Өмірзақұлы.
Іріктеу турының барлық қатысушыларына бөлімшенің және мекемелердің кәсіподақ ұйымдары атынан арнайы диплом, кубок және бағалы сыйлықтар тапсырылды.