Кубогқа кім лайық?

Қарағанды-Сұрыптау станциясында жақында өткен «Қазпрофтранс-2019» теміржол футбол лигасының кубогі» турнирі өз мәресіне жетті.

Ақтық финалға өңіраралық турнир кезеңдерінің жеңімпаздары, атап айтқанда, Қарағанды локомотив пайдалану депосы, «Қарағандытранстелеком» филиалы, Көкшетау электрмен жабдықтау дистанциясы, Қызылорда локомотив пайдалану депосы, «Құрық порты» ЖШС, Семей белгі беру және байланыс дистанциясы қатысты.

Шеңберлік жүйеде екі күн бойына өткен жарыс нәтижесінде екінші жыл қатарынан тәжірибелі, әрі ауызбірлігі мықты Қарағанды локомотив депосы бірінші орын алды. Ұйымдастыру комитеті бірнеше аталым бойынша спортшы теміржолшыларды марапаттады. Мәселен, «Үздік ойыншы» аталымымен локомотив депосының есепшісі Думан Қуандық, «Құрық порты» ЖШС менеджері Азамат Елтаев, Қарағанды ТТК электр механигі Асхат Тайбасаров, ЭЧ-6 электр механигі Роман Ушаков, машинист көмекшісі Сұлтан Әбілов және ШЧ-29 талдау жасаушысы Ғалымжан Хабиғали осы марапатқа ие болды. Ал жалғыз өзі 9 гол салып, «Үздік шабуылшы» ретінде танылған Қарағанды ТТК электр механигі Бауыржан Шакиев болды.

– Теміржолда кәсіподақ комитеті жұмысшылардың спорттық шараларға қатысуын ерекше қолдау білдіреді. Әрине, әр компания үшін табыс пен экономикалық өсім маңызды, бірақ сол өсімді қамтамасыз ететін жұмысшы персоналдың денсаулығы, ауызбіршілігі, командалық рухының мықты болуы да бірінші кезекте қарастырылуы керек, – дейді Қарағанды ЖТ бөлімшесінің кәсіподақ комитетінің төрағасы Ғалым Ермекбаев.

Жеңімпаз команда биыл маусым айында кәсіподақ атынан Республикалық салааралық спартакиада да ойын көрсеткен болатын. Ел көлемінде өткен ол жарысқа 12 салалық кәсіподақтар командалары қатысып, қарсылас металлургтер, энергетиктер және басқаларының мықтылығына қарамастан қарағандылық локомотившілер бас жүлдені алған еді. Осындай ерліктері үшін де кәсіподақ ұйымы жеңімпаз командаларды барлық жағынан қолдап отыратынын жеткізді.