Қытай – Еуропа теміржол экспресі 130 мың рейс межесіне жетті
Қытай – Еуропа бағытындағы теміржол экспресі 130 мыңыншы рейсін орындады. Мерейтойлық жүк пойызы Қытайдың Хэнань провинциясының орталығы Чжэнчжоудан Германияның Гамбург қаласына шыққан, деп хабарлайды Rail-news.kz.
Қытай мемлекеттік теміржол компаниясының мәліметінше, осы уақытқа дейін тасымалданған жүктің жалпы құны 520 миллиард доллардан асқан.
Компания соңғы жылдары Қытай – Еуропа теміржол бағыттарын үнемі жетілдіріп келе жатқанын мәлімдеді. Қазіргі таңда сағатына 120 шақырым жылдамдықпен жүретін 93 тұрақты маршрут жұмыс істейді.
Бүгінде Қытайдың 129 қаласында Қытай – Еуропа теміржол экспресі қызмет көрсетеді. Бағыттар Еуропаның 26 еліндегі 235 қаланы және Азияның 11 еліндегі 100-ден астам қаланы байланыстырып отыр. Осылайша жоба Еуразия аумағының басым бөлігін қамтыған.
Мамандардың айтуынша, бұл қызмет іске қосылғалы бері жүк тасымалы тарифтері 40 пайыздан астам төмендеген. Қазір пойыздар 53 санатқа жататын 50 мыңнан астам тауар түрін тасымалдайды.
Қытайдан негізінен автокөліктер, автокөлік бөлшектері, техника, электроника және электр жабдықтары экспортталады. Ал Қытайға Еуропадан ағаш, целлюлоза, арнайы ауыл шаруашылығы өнімдері мен күнделікті тұтыну тауарлары жеткізіледі.