Stadler төрт осьті жүк электровозын таныстырды
Stadler компаниясы Валенсиядағы (Испания) зауытында Швейцария федералдық теміржолының (SBB) құрамына кіретін SBB Cargo Schweiz жүк операторы үшін арнайы жасалған EURO DuFour төрт осьті магистральдық локомотивін таныстырды, деп хабарлайды Rail-news.kz.
Stadler бұл локомотивтердің түрлі модификацияларын 2024 жылғы қыркүйекте жасалған негіздемелік келісімшарт бойынша жеткізеді.
Қазіргі уақытта SBB Cargo Schweiz операторы 36 электровозға тапсырыс берді, оның 22-сі тартымдық аккумуляторлармен жабдықталған. Негіздемелік келісімшартта тағы 93 машинаға дейін сатып алу мүмкіндігі қарастырылған.
Stadler компаниясы EURO DuFour локомотивін Еуропада кең таралған Alstom және Siemens компанияларының төрт осьті локомотивтерімен бәсекелесе алатын жаңа буын электровозы ретінде таныстырып отыр. Бұл электровоз айнымалы тоқпен (25 кВ, 50 Гц немесе 15 кВ, 16,7 Гц) немесе тұрақты тоқпен (3 немесе 1,5 кВ) электрлендірілген желілерде еркін жүре алады. Тартым жетегінде үш деңгейлі инверторлық технологияны қолдану қуат тиімділігін арттыруға мүмкіндік берген. Нәтижесінде EURO DuFour локомотивінің энергия тұтынуы қазіргі қолданыстағы парк машиналармен салыстырғанда 15%-ға төмендеген.
Сонымен қатар, бұл локомотивтің экологиялық таза дизельдік қозғалтқышы бар немесе жалпы қуаты сәйкесінше 1 МВт және 2 МВт-қа дейін жететін тартымдық аккумуляторлары бар гибридті нұсқалары да қарастырылған.
Локомотивтің шанағы тұтас құйылған жеңілдетілген конструкциядан тұрады. Бұл оның салмағын айтарлықтай азайтуға мүмкіндік берді (тек электрмен жүретін нұсқасында 80 тоннаға дейін). Осының арқасында электровоз осьтік жүктеме шегі төмен екінші дәрежелі теміржол желілерінде де жүре алады. Локомотив сағатына 160 шақырымға дейін (ал жолаушылар таситын нұсқасында 230 км/сағ-қа дейін) жылдамдық алады. Оған DAC сандық автотіркегішін немесе гибридті тіркегішті орнатуға болады. Жақсартылған арбашалардың арқасында жолдың тозуы нарықтағы басқа локомотивтермен салыстырғанда 20%-ға азайған.
2026 жылдың екінші жартысында EURO DuFour локомотиві Велимдегі (Чехия) сынақ полигонында тексерістен өтеді. Ал 2027 жылы ол Швейцарияға жеткізіліп, пайдалануға рұқсат алу процедураларынан өтеді. Бақылау мақсатындағы қолданыс 2027 жылдың соңында басталады, ал алғашқы тапсырыстағы барлық 36 локомотивті жеткізуді 2029 жылдың наурызына дейін аяқтау жоспарланған.