Қытайдың CRRC компаниясы Түрікменстанға алғашқы үш секциялы жүк тепловоздарын жеткізді
11 маусым күні Ашхабад станциясында екі жаңа локомотивтің таныстырылымы өтті. CRRC компаниясының Цзыянь қаласындағы зауытында шығарылған бұл жылжымалы құрам «Демиреллары» ұлттық тасымалдаушысына табысталды деп хабарлайды Rail-news.kz.
Мәліметтерге қарағанда, жаңа тепловоздар салмағы 6,3 мың тоннаға дейінгі поездарды тартуға қауқарлы және олардың ең жоғары жылдамдығы сағатына 100 шақырымды құрайды. Алты осьті әрбір секция пайдалану тиімділігін арттыратын заманауи басқару жүйесімен жабдықталған. Осы үлгідегі тепловоздардың жалпы қаншасы жеткізілетіні туралы ақпарат әзірге жарияланбады.
Осы жылдың басында CRRC компаниясы «Демиреллары» үшін CKD9C және CKD9A сериялы 20 жүк тепловозына күрделі жөндеу мен терең модернизациялау жұмыстарын аяқтаған болатын. Бұған дейін бұл техникалар орта есеппен 20 жыл бойы пайдаланылып, 2 миллион шақырымнан астам жолды жүріп өткен еді. Жаңарту жобасы аясында локомотивтердің негізгі бөлшектері (арбашалары, дизельді қозғалтқыштары мен электрлік жүйелері) мұқият жөнделіп, оларға жаңа буынның интеллектуалды басқару жүйелері, қауіпсіздікті бақылау технологиялары мен эргономикалық жақсартулар енгізілді.
Ал CRRC компаниясының Түрікменстанға су жаңа жылжымалы құрам жеткізу бойынша соңғы келісімшарты 2023 жылдың мамыр айында аяқталған еді. Сол кезде 2022 жылы тапсырыс берілген 15 дана екі секциялы CKD9A-1 сериялы магистральдық жүк тепловоздарының соңғы екеуі қабылданып алынған болатын. Жалпы алғанда, 2004 жылдан бері Цзыянь зауыты Түрікменстанға 300-ге жуық магистральдық және маневрлік локомотивтер жеткізді. Бүгінде бұл техникалар елдегі теміржол тасымалының 98%-дан астамын қамтамасыз етіп отыр.