Ресейлік теміржолшылар ҚТЖ мұражайында болды
Ақтөбе облысы бойынша меншікті тілші
Жуырда Батыс филиалының кәсіподақ ұйымы өткізген жиынға арнайы келген ресейлік қонақтар Қазақстан темір жолының тарихынан сыр шертетін мұражайда болып, түпнұсқада сақталған экспонаттарды тамашалады.
Батыс филиалының кәсіподақ төрағасы Ғабит Садықов ынтымақтастық кездесу, тәжірибе алмасу шарасына қатысқан ресейлік делегацияны Ақтөбедегі теміржолшылар мұражайына апарды. Батыс Қазақстан теміржолының тарихы ғана емес, тұтас сол дәуірдің мәдениеті мен тұрмысы, темір жол саласын қалыптастырған тау тұлғалы ардагерлердің бұрышы қонақтарға ерекше әсер етті.
«Оренбургтан келдім. Қазақстанға алғаш жолым түсті. Мұражайдан керемет эмоциямен шықтық. Түпнұсқада сақталған тарихи құжаттар мен фото альбомдардан тұтас бір дәуірді көруге болады екен. Теміржол тарихы қаз-қалпында тұр», – деді «РОСПРОФЖЕЛ» еңбек инспекторы Юлия Машинская.
Қонақтар жәдігерлермен суретке түсіп, фото альбомдарды ұзақ тамашалады.
«Мұражай экспонатқа бай екен. Жастық шағымызды, 50 жыл бұрынғы теміржолды көз алдымызға әкелді. Тарихи жәдігерлерді сол күйі сақтап қалған әріптестерімізге риза болдық», – деді Орынбор локомотив пайдалану депосының бастауыш кәсіподақ ұйымының төрағасы Сергей Скоробогатых.
Тарихи мекеннің төрт бірдей залын асықпай таныстырған мұражай қызметкері Анар Жұбаева мұнда 400-ге жуық құжаттар мен экспонаттар сақталғанын жеткізді. Ақтөбедегі теміржолшылар мұражайы Батыс Қазақстан темір жол басқармасы басшысының бұйрығымен 1989 жылы жасақталған. Ондағы барлық экспонаттар мен құнды жәдігерлер жергілікті теміржолшылардың көмегімен жинақталған.
