Болашақ станциясында жүк ағыны күрт артты
«Қазақстан теміржолшысы» газетінің тілшісі
Түрікменстанмен шекарадағы Болашақ станциясы арқылы өтетін жүк пойыздарының саны күрт артқан. Әсіресе, былтыр қараша айының соңынан бастап станция жолдарына келетін пойыздар сыймай, олар көрші бекеттерге бөлініп орналастырылған. Бұл туралы станция бастығы Мақсат Нұрбеков мәлімдеді.
Болашақ станциясында 10 жол болса, соған келетін пойыздар сыймай тек 8 жолға қабылдап, екеуі күнделікті келетін, өтетін пойыздарға босатылған. Қалған пойыздар Бестөрткүл, Құрмаш, Ақбөбек, Тайғыр, Өзен, Жетібай, Рай т.б шағын бекеттерге біреу-екеуден қойылған.
Осы орайда ол Түрікменстанның Болашақ сияқты шекаралық станциясы Серхетякада бар болғаны 6 жол бар екенін, осы жағдай да олардың жұмыс өнімділігіне кедергі келтіріп тұрғанын айтты. Сол себепті оларға жүк пойыздарын көптеп қабылдау қиындық келтіріп жатқанға ұқсайды. Ал Серхетякадан әрі қарай бекеттер Қазақстандағыдай жақын орналаспаған, одан әрі Берекет станциясына дейінгі аралық 440 шақырымды құрайды. Сөйтіп локомотивтер бұл аралықта тым ұзақ жол жүреді.
Мақсат 2021 жылды алдағы жылмен салыстырғанда табысты болды деп қорытындылайды. Барыс жылы да сәтті жыл болады деген сенімде. Өткен жылы Болашақ станциясы арқылы шетелге 438 пойыз, яғни 20556 вагон жүк жөнелтілсе, керісінше Түрікменстаннан Қазақстанға 392 пойыз, яғни 17188 вагон жүк қабылданған. Өтіп жатқан жүктердің көбі – астық. Мысалы, бір пойызда 41-42 вагон болса, соның барлығы астық. Кейде аралас та жүктер кездеседі. Қазақстанның Ақмола станциясынан Түрікменстанның түрлі өңірлеріне астық жөнелтілуде. Ал транзиттік жүктер Иранға бағыт алуда. Көбіне, олар жеміс-жидектер мен көкөністер жібереді. Эпидемиологиялық жағдайға байланысты Маңғыстау облысы «қызыл» аймақтағы өңір болғандықтан Болашақ станциясында карантин шаралары қатаң сақталады.
Райхан Рахметова