Бершүгір станциясы биыл жүк тиеу көлемін 3 млн тоннадан асыруды көздеп отыр

«ҚТЖ– ЖТ» ЖШС Батыс аймақтық филиалына қарасты Бершүгір станциясынан өткен жылы 2 миллион 700 тонна қиыршық тас тиеліп, жөнелтілген. Жол картасы бойынша жұмыс жоспарының артуына байланысты станция биыл жүк тиеу жұмыстарының көлемін 3 миллион тоннадан асыруды көздеп отыр.

Станцияда жүк тиеу жұмыстары өткен жылдың жаз айында қарқын алды. Станция басында тоғыз кірме жол бар, олардан күніне 200-250 вагон қиыршық тас тиеліп жөнелтіліп жатты. Бершүгір аумағынан шығарылатын қиыршық тасқа Қызылорда, Атырау, Ақтөбе, Маңғыстау, Орал облыстарынан сұраныс көп. Жалпы, соңғы жылдары Қазақстанда қиыршық тасқа сұраныс айтарлықтай артқан. Өнімнің бәсекеге қабілеттілігін сақтау мақсатында Бершүгір қиыршық тас зауыты жол құрылысына қажетті тауарлы ірі фракциялы қиыршық тас өндірісінен сұранысқа ие жоғары сапалы ұсақ фракциялы қиыршық тас өндірісіне ауысты.

"Станциядан тек республиканың іші емес, көрші елдерге, Ресей мемлекетіне де қиыршық тас жөнелтеміз. Теміржол тасымалында, вагондарды дайындау, тиеу, жөнелту жұмыстарында кедергі болған емес. Бүгінде жол картасы аясында жұмыс жасап жатырмыз," – дейді Бершүгір станциясының басшысы Серік Жұбаназаров.

Жолаушылар пойызынан бөлек жүк пойыздары үздіксіз үлкен қарқынмен өтіп жатқан станцияда қауіпсіздік мәселесі қашан да өзекті. Бүгінде теміржол бойындағы қоршаулардың бұзылған жерлерін қайта қалпына келтіру, белгі беру қондырғыларының ақаусыз жұмыс жасауын қадағалау, жергілікті тұрғындармен, мал иелерімен профилактикалық түсіндіру жұмыстары қарқынды жүріп жатыр. Мектептерге барып оқушылармен кездесулер ұйымдастырылуда. Барлық станциялар қауіпсіздікті күшейту жөнінде хабарлама алған. Оған теміржол аумағында жылжымалы құрамдармен болып жатқан апатты жағдайлар, күн жылынып көктем келуімен жол бойында төрт түліктің көбеюі, т.т жағдайлар себеп болуда.

"Адамдардың басын жинау қиын болғасын халық көп жиналатын той-садақаларға арнайы барып, темір жолдағы қауіпсіздік жайын түсіндіріп, жылжымалы құрамның қозғалысына кедергі келтірсе, малдың иесіне айыппұл салынатынын, жауапкершіліктің қатаңдатылатынын ескертудеміз", – дейді станция басшысы.