Теміржолшыларды маусымдық киіммен қамту басты назарда

Қызылорда жол дистанциясында жұмысшылардың қауіпсіздігі мен еңбекті қорғау мәселесі әрдайым басшылық назарында. Әсіресе, жолшылардың қысқы-жазғы маусымдық киіммен қамтамасыз етілуі айрықша бақылауға алынған.

 Техникалық қауіпсіздік және еңбек қорғау инженері Майра Бадрақованың мәліметінше биыл жыл басынан бері 23 түрлі арнайы киімге тапсырыс беріліп, маусымдық киіммен қамту 100 пайыз орындалған. Яғни, сұраныс дер кезінде келіп жетіп, жұмысшыларға таратылған. 

– Биыл дистанция бойынша 541 жиынтық мақта-мата костюмі, 4215 жұп қолғап, 133 плащ, 550 жаздық бас киім, 3 дана дәнекерлеуші костюмі, 30 жұп әйелдердің бәтеңкесі, 20 жұп резеңке етік, 5 жұп диэлектрлік қолғап, 350 белгі беру жилеттеріне тапсырыс берілді. Олардың бәрі түгел алынып, еңбеккерлерге таратылды. Жұмысшылар жаздық арнайы киімдермен 100 пайыз қамтамасыз етілді. Бүгінде қысқы маусымдық киімдерді түгендеп жатырмыз, – деді еңбек қорғау инженері Майра Бадрақова. 

Жазғы аптап ыстықта жолшылар қауіпсіздігі қатаң бақылауда ұсталған. Жұмыс кестесіне уақытша өзгеріс енгізіліп, далада жұмыс істейтін жолшылардың бірін-бірі көзден таса қылмауы, таңертеңгі кешкі салқында  белгіленген уақытта жұмыс істеуі қарастырылған. Және жұмысшылардың түскі үзіліс уақытында демалуы және тамақтануы үшін қолайлы жағдай жасалған. Қазіргі таңда күн салқындап, жұмыс кестесі қалыпты жағдайға көшірілген. 

Сонымен қатар, жол дистанциясының жұмысшыларына арналған қызметтік ғимараттарда 393 киім шешетін гардероб, жуынып-шайынатын 26 душ, 43 қолжуғыш, 42 киім кептіретін шкаф қарастырылған. Дистанция бойынша жыл басынан бері өндірістік жарақат орын алмаған және «Жолдағы адам» жүйесі бойынша барлық жағдай бақылауда. 

Жолшылардың жұмыс жасауына қолайлы жағдай жасалу үшін арнайы комиссия мүшелері тарапынан жұмыс орындарының талапқа сай жайлылығын тексеру жұмыстары өткізіліп, арнайы рұқсат беріледі. Мәселен, осы жылы 2 жұмыс орнын аттестациядан өткізу жоспарланып отыр. Ал зиянды жұмыс орындарында еңбек ететіндер сүт өнімдерімен тұрақты қамтамасыз етіледі. 

Мысалы, биылғы жылы «СвязьстройСнабСервис-2008» серіктестігімен келісім-шарт жасалып, 1120 литр сүтке тапсырыс берілген. Бүгінге дейін 368 литр сүт жұмысшыларға таратылған.