Таулы аймақта орналасқан станцияның жазғы дайындығы оң бағаланды

Шымкентке кіреберістегі  Машат тауының баурайында орналасқан Түлкібас станциясы табиғаты көркем таулы аймақ. Арыс-Тараз магистралінде орналасқан екінші класты станция Шымкент және Жамбыл бөлімшелерінің арасындағы түйіспе бекет болып табылады.

Түлкібас станциясы транзиттік жүк және жолаушылар пойыздарын қабылдап өңдеуді және жөнелтуді, құрама пойыздарды таратуды, жұп және тақ құрама пойыздарды қалыптастыруды, жергілікті вагондарды өңдеуді, вагондарды ағытып және ағытпай жөндеуді, локомотив бригадаларын ауыстыруды жүзеге асырады.  Қарама қарсы бағытта зулаған транзиттік пойыздардың бәрі Түлкібастан өтеді. Жолаушы пойыздарының да дені аялдама жасайды. Станцияда бір мезгілде жұп және тақ бағыттарда пойыздарды қабылдау және жөнелту жүзеге асырылады.  

Үшінші мегополиске кірер қақпа сынды  станцияда 12 қабылдау-жөнелту жолы, 5   арнайы және 9 басқа жолдардан тұратын бір қабылдау-жөнелту паркі жұмыс істейді және "МПДЦ-НЕМАН" микропроцессорлық диспетчерлік     орталықтандырумен жабдықталған. Станция бастығы мен  жедел жұмыс жөніндегі орынбасарының, станция кезекшісінің, СТО аға операторы мен  операторының, жүк пен багаж қабылдап-тапсырушылардың, вагон операторының, аға тауар кассирі мен тауар кассирінің жұмыс орындары түгелдей автоматтандырылған басқару  жүйесіне қосылған. Станцияда штат бойынша барлығы 42 адам жұмыс істейді.  

Жергілікті жүк тиеу де жоғары деңгейде.  Станция қызметін ауданның «Түлкібас әк зауыты» ЖШС, «Күнбас-1» өндірістік кооперативі және сол төңіректегі  ірілі-ұсақты кәсіп иелері тұрақты пайдаланады. Ал Түлкібастың атақты алмасы  Қазақстаннан асып, Ресейге тіпті шет елдерге дейін экспортталады. Таулы аймақтың жеміс-жидегі мен балы,  қаймағы қашан да  жоғары сұранысқа ие.  Жеке кәсіпкерлер өнімдерін республика ішіне тасымалдауда теміржол қызметіне жүгінеді.  Түлкібас  станциясының бастығы  алдағы уақытта табиғи өнімдерді тасымалдау бойынша отандық брендтер пайда болса, оның да отаны Түлкібас болатынына дау  жоқ дейді.    

– Осы жылдың 14-сәуірінде өңірлік көктемгі байқау біздің  Түлкібас станциясында өтті. ҚТЖ «Жүк тасмалы» Шымкент филиалының директоры міндетін атқарушы Нұрдәулет Байғазиев пен Магистральдық желі бөлімшесінің директоры Алғазин Қойлыбаев бастаған комиссия мүшелері пойыздар қозғалысының қауіпсіздігін қамтамасыз ету жағдайы мен жазғы тасымалға дайындығымызға оң бағасын берді, – дейді Түлкібас станциясының бастығы Нематилла Тойчибаев.