Жоңғар қақпасындағы станция

Достық станциясы – ел темір жолының негізгі көлік тораптарының бірі. Шекаралық өткелде еңбек ететін теміржолшылар табиғаттың күрделі климаттық жағдайында жұмыс істеп, белгілі бір қиындықтармен бетпе-бет келіп жатады.

Шекаралық станция арқылы теміржолмен Қытайға, Еуропаға және кері бағытта жүк тасымалданады. Осы жылдың тоғыз айында Достық – Алашанькоу (ҚХР) өткелі арқылы жүк айналымы өткен жылдың сәйкес кезеңімен салыстырғанда 17% өсіп, 11,8 млн тоннаны құрады. Оның ішінде импорт – 3,3 млн тонна (+4%), экспорт 8,5 млн тонна (+24%) деңгейіне жетті. Станция қызметкерлері күн сайын ҚХР-ға 15 пойыз тапсырады.  

Станциядағы жұмыс процесін ұйымдастыру кезінде жергілікті теміржолшылар үшін кейде табиғи құбылыстар қиындық тудырады. Себебі мұндағы климат – күрт континентальды. Жазда температура +50С°, қыста –50С° аралығында болады. Станция Жоңғар қақпасының қазақстандық жағында орналасқан, олар шаңды, құмды және кейде тіпті ұсақ тастарды суырып соғатын дауыл мен екпінді желдің (70 м/с дейін) өтінде жұмыс істеуге мәжбүр. Қыста және күзде Көктұма – №16 разъезд – Ақтоғай – Достық теміржол учаскесінде теміржолшылар ауа райының қиын жағдайында жұмыс істейді. Қатты ызғарлы жел теміржол көлігінің жұмысын қиындатып, учаскенің өткізу қабілетіне кері әсер етіп жатады. Станция қызметкерлері табиғи құбылыс әсерлерін азайту, тасымалдаудың қауіпсіздігі мен уақытылы жүргізілуін қамтамасыз ету үшін қолдан келгеннің бәрін жасауда.  

Жалпы, осы жылдың 9 айында ҚХР мен Қазақстан арасындағы тасымалдау көлемі 22% артып, 21,1 млн тоннаны құраса, экспорт 31%, ал импорт 10% өскен.