Сексеуіл станциясы өндірістік жұмыстарды асыра орындады

Қызылорда қосалқы бөліміне қарасты Сексеуіл станциясы – аймақтың солтүстігіндегі тораптық станция. Станцияда вагондарды сұрыптау жұмыстары Сексеуіл-Қоскөл-Жезқазған, Сексеуіл- Арыс және Сексеуіл-Қандыағаш бағыттары бойынша жүргізіледі.

Өткен жылы маневрлік және станциялық жұмыстарда пойыздардың қозғалыс қауіпсіздігі бұзылуына жол бермей, өндірістік жұмыстардың көрсеткішін 112-134 пайыз аралығында асыра орындаған сексеуілдіктер билғы жылдың межесін де осы қалыпта ұстауға бекініп отыр. Барлық жұмыс қауіпті аймақта іске асырылатындықтан қауіпсіздік шараларына басымдық беріп еңбек қорғау, техникалық қауіпсіздік талаптары назарға алынуда.  

– Сексеуіл тораптық станция болғандықтан мұндағы жұмыстар Сексеуіл-Қоскөл-Жезқазған, Сексеуіл-Арыс және Сексеуіл-Қандыағаш сияқты үш бағытта жүргізіледі. Станцияға келген-кеткен құрамдарды сауатты қабылдап-жөнелтіп отырған сауатты станция кезекшісінің ролі жоғары. Бұл тұрғыда біздің станция кезекшісі Биғали Берден мен кезекші жанындағы оператор Бағия Рысмамбетова өз істерінің шебері екенін айтар едім. Маневр диспетчері Ертай Кемаладинов пен пойыз құрастырушылар шеберлігі де кәсіби деңгейді көрсетеді. Жалпы, бізде кездейсоқ адам жоқ, бәрі өз орнында отырған тәжірибелі теміржолшылар. Сондықтан жұмыс та ұқыпты, ретті атқарылып, сауатты жүреді, – деді станция бастығы Абдулхамид Тұрмантаев әріптестеріне деген сенімі мен құрметін жасырмай.  

Төрт ауысыммен жұмыс істейтін сексеуілдіктер жүк вагондарынан көмір, тұрмыстық және құрылыс заттарын көп түсіреді, ал станциядан тиелетін жүк жанар-жағармай мен тұрмыстық қажеттіліктер екен.