Табысқа жетелейтін фактор

Қызылорда ЖТ бөлімшесіне қарасты Сексеуіл станциясы аймақтағы көшбасшы ұжым саналады. Бөлімшенің солтүстігіндегі тораптық станция теміржолшылары еңбектің көзін таба білу, табысқа жетелейтін басты фактор деп біледі. Оған олардың мамыр айын қомақты табыспен қорытындылауы дәлел.

Сексеуіл станциясы арқылы пойыз құрамалары Арыс, Жезқазған, Шалқар бағытына жөнелтіледі. Мамыр айында пойыздық және маневрлік жұмыстар кезінде пойыздардың қозғалыс қауіпсіздігінің бұзылуына жол берілмей, барлық өндірістік көрсеткіштер асыра орындалған.  

– Мамыр айында жүк тиеу мен түсіру жұмыстары бекітілген жоспардан асыра орындалды: 47 вагонға жүк тиеу межесін 72 вагонға дейін жеткізіп жоспарды екі есеге жуық асыра орындай білдік. Ал бес ай ішінде 178 вагон жүк тиелді. Сонымен қатар, мамырда 118 вагоннан, ал бес айда 698 вагоннан жүк түсірілген. Аталған көрсеткіштердің жоспардан асыра орындалуы станциядағы жұмыстардың кәсіби деңгейде ұйымдастырылуы мен орындалуында деп білемін. Станцияда жұмыс істейтін әрбір теміржолшының өздеріне бекітілген жұмыстарды кәсіби деңгейде атқара білуінің нәтижесі. Жалпы менің әріптестерімнің барлығы кәсіби деңгейі жоғары, тәжірибелі теміржолшылар. Дегенмен мамыр айында ерекше көзге түскен әріптестерімнің атын атап өту арқылы оларға деген алғыс-құрметімді жеткізгім келеді. Мәселен маневр диспетчері Илиясов Қазбек станцияға келген пойыздарды кесте бойынша реттеп, барлық пойызды шашау шығармай қабылдап-жөнелткен кәсіби шеберлігімен көзге түсті. Ал, станция кезекшісі Абдирахманов Жаппарберді болса кезекшілік кезінде пойыздарға қатысты жұмыстарды біліктілікпен атқарды.  

Тасымал құжаттарын сұрыптаушы Жұлдыздай Даутова да құжат рәсімдеуде сауатты әрекет етті. Тауар кассирі Гүләнда Кабулова құжаттардың рәсімделуіне байланысты кассалық жұмыстарды шапшаң рәсімдеп отырды. Ал жүк қабылдап тапсырушы Сарбиназ Иманалиев жүк құжаттарын дер кезінде реттей білді. Пойыз құрастырушы Сериков Қуаныш болса жүк вагондарын сұрыптау кезінде қауіпсіздікті сақтай отырып сауатты қимылдап, кәсіби теміржолшыға тән еңбек етті. Аталған әріптестерімнің қай-қайсысы да ұжымның ортақ табысына осылай өз үлесін қосқан таңдаулы теміржолшылар, – деді Сексеуіл станциясының бастығы Абдулхамит Тұрмантаев.