Соңғы станцияның жүгі ауыр

Семей ЖТ бөлімшесіне қарасты шекара шебіндегі үшінші класты Ауыл станциясы шағын болғанымен жүк және жолаушы тасымалындағы жүгі ауыр.

Ауыл – ұзындығы 119,7 шақырым болатын, теміржолшылар аузымен «Солтүстік тармақ» аталатын Семей – Локоть телімінің ең шеткі нүктесі. Әрі еліміздің Сібірге ашылған қақпасы саналады. Биыл құрылғанына 111 жыл болатын станция соңғы кезде жаңарып, қайта жаңғыруда. Жуырда су жаңа вокзал пайдалануға берілді. Нәтижелі орындалған инфрақұрылымдық дамыту – жүк тиеу мен түсіру, транзиттік пойыздар ағынын реттеуде де зор тиімділік әкелуде. Жаңарған вокзал ғимаратында орналасқан станция жұмысы да қайта жанданып сала берді.  

– Қазіргі күні Ауыл станциясында бір ауысымда ең кемі 15 пойыз өтеді. Алдағы айлардан бастап астық тиеу маусымының басталуына байланысты жүк тиеу жұмыстары күрт ататын болады. Даярлық іс-шараларын қазірден бастап пысықтап жатырмыз, – дейді бұл орайда станция кезекшісі Алмира Күмісова.  

Ауыл – 100-ге жуық теміржолшы тұратын шағын ғана елді мекен болғанымен экспортқа жүк тиеуде алдыңғы қатардан табылатын станция. Аграрлы өңірдің шаруалары негізінен күнбағыс, қарақұмық, бұршақ тұқымдас дақылдарын тиеуге тапсырыс береді екен. Алдағы апталарда күздік қара бидайға орақ түсетіндіктен вагондардың қажеттілігі де артатын болады. Тиелген жүктердің басым бөлігі Семейдегі қамбаларға жөнелтілгенімен кейбірі алыс шетелдерге жіберіледі.  

Яғни, шілде-тамыз айларынан бастап жүк тасымалы бойынша қозғалыс барысы күрт жоғарылайтын болады. Жабық контейнерлерге тиелетін сусымалы тауарды межелі жерге жеткізу станцияның тауар кассасы мен пойыз құрастырушылардың еңбегіне елеулі күш түсіреді. Жалпы, станциядағы көрсеткіштер жыл санап еселеп өсуде. Тасымал қарқыны артқан шақта тәулігіне ең кемі 15 вагонға дейін тапсырыс беріледі екен. Яғни, алдағы апталарда «Шығыс-Астық» ЖШС-на қарасты кірме жолында жылдағыдай қарбалас басталады деген сөз.  

Десек те, қозғалысшылар үшін басты міндет – жабық вагондардың қажеттілігін реттеу, тастанды пойыздарды болдырмау, шекара түбінде жылжымалы құрамдар іркілісін туғызбау. Бұл жылдағы қайталанатын негізгі міндет. Осынау орайда тәжірибелі қозғалысшы, білікті станция басшысы Қарлығаш Мазанқызы бастаған жергілікті теміржолшылар қауымы қозғалыс қауіпсіздігі талабына сай еңбек етіп, жоспарлы шараларды межелі мерзім ішінде орындайтындықтарына бек сенімді.