Ірі теміржол торабын бағындырған нәзік жандылар

Қандыағаш станциясы – еліміздегі ең ірі алты теміржол торабының бірі. Кластан тыс станция төрт бағытқа қызмет көрсетеді. Мұнда тәулігіне 6 мыңға жуық вагон өтіп, 4 мыңға жуық вагон сұрыпталады.

Осындай ауқымды жұмыстың тасасында, құжаттан қозғалысқа дейін барлық жауапкершілік жүктелген станцияда еңбек ететіндердің барлығы - әйелдер. 41 нәзік жан иелері еңбек ететін техникалық бөлімнің жұмысы сырт көзге байқала бермесі анық, дегенмен ірі теміржол торабындағы пойыздардың қауіпсіз әрі уақытылы қозғалысында олардың еңбегі қаншалықты ауқымды әрі жауапты екенін бағамдауға болады.  

– Станцияға келген-кеткен әр пойыздың құжаты біздің қолымыздан өтеді. Әр вагонға жеке-жеке құжат дайындалады. Бір құрамдағы 73 вагонның әрқайсысы әртүрлі бағытқа кетуі мүмкін. Қай вагонның қайда баратынын, ішінде қандай жүк барын, салмағы қанша екенін білуіміз керек, мысалы, міне мынау бір пойыздың құжаты, мұнда бір құрамдағы вагондардың бір бөлігі Арысқа, енді бірі Орскіге, Жіңішкеге, Кемпірсайға, Илецк пен Мақатқа жөнелтілетіні көрсетілген. Әр вагонның салмақ нормасы, жүктің сипаттамасы, қозғалыс талаптары да мұқият тексеріледі, – деп бізге тәптіштей түсіндірді техникалық бөлімнің бастығы Сәндігүл Мениязова.  

Сәндігүл Мениязова Қандыағаш станциясында 1985 жылдан бері еңбек етеді. Теміржол саласындағы еңбек өтілі – 41 жыл. Ал техникалық бөлімді соңғы 22 жылдан бері басқарып келеді.  

– Техникалық бөлім қызметкерлері пойыздардың келуі мен жөнелуін тіркейді, тасымал құжаттарын рәсімдейді, вагондардың қозғалысын бақылайды, кедендік жүктердің мерзімін қадағалайды. Құжаттар машинистерге тапсырылып, жүктің дұрыс тиелуі мен тасымалдануы бақылауда ұсталады. Тіпті әр телімдегі қозғалыс жылдамдығына дейін құжаттарда көрсетіледі. Бүгінде біз заманауи цифрлық жүйелермен жұмыс істейміз. Алайда технология қанша дамығанымен, адамның мұқияттылық пен жауапкершілігін ештеңе алмастыра алмайтыны сөзсіз, – дейді «әйелдер пашалығын» басқарып отырған Сәндігүл Мениязова.