Бершүгір: ғасырдан аса тарихы бар
Ақтөбе облысы бойынша меншікті тілші
Қазақ даласындағы алғашқы теміржол құрылысы Батыстан басталғаны белгілі. Ақтөбеде ол Бершүгір тауларының үстімен өтті. Жергілікті халық жол салу жұмыстарына тартылып, теміржол саласында еңбек етуді бастаған. Бүгінде ғасырдан аса тарихы бар Бершүгір жол дистанциясы сол жылдары құрылған. Арнайы сапарымызда таулы аймақтағы Бершүгір жол дистанциясының жұмысымен таныстық. Табиғаты қатал бұл өңірде, әсіресе, қыс айлары теміржолшылар үлкен қиыншылықпен жұмыс істейді. Десек те, темірдей тәртіпке үйренген жергілікті теміржолшылар алты ай қыстың ақтүтек боранында да пойыздар қозғалысын тоқтатқан емес. 1900 жылдары Орынбор-Ташкент теміржолының құрылысы басталғанда 1903 жылы Бершүгір ауылында Ресей инженерлері вокзал салып, теміржол станциясына Бершүгір аты берілген екен. Ол кезде Орынбор теміржолының құрамында болды. Ғасырлық таихы бар Бершүгір жол дистанциясында жастар көп, бәрі де тәжірибелі мамандар. Дистанцияда биылға жоспарланған жөндеу жұмыстары толықтай аяқталған. Биылғы жылы дистанцияда барлығы 26 км жолға жөндеу жұмысы жоспарланған. Оның ішінде «Ұлпан-Қайдауыл» бекетіндегі тақ жолға күрделі жөндеу жүрді. «Ұлпан-Қайдауыл» бекетіндегі ағаш шпалдар толықтай темірбетонға ауысты. Бұл жердегі шпалдар 1986 жылы күрделі жөндеу кезінде салынған екен. Ағаш шпал кезінде жол сапасының нашарлығына байланысты өткен жылдан бастап жолаушылар пойызының жылдамдығы 50 км/сағ, жүк пойызы 40 км/сағ шектелді. Енді күрделі жөндеуден кейін бұл жерлердегі жолаушылар пойызының жылдамдығы 100 км/сағ, жүк пойызы 90 км/сағ көтеріледі», – дейді Бершүгір жол дистанциясының бас инженері Жасұлан Өтетілеуов. Ол 2007 жылдан бері теміржол саласында еңбек етіп жүр. Еңбек жолын жол жөндеуші болып бастады. Екі жылдан кейін ақау тапқыш оператор болып, кейін кезекші диспетчер, өндірістік техникалық бөлімде инженер, жол шебері қызметтерінде істеп, қазір жол дистанциясының бас инженері. Қайдауыл бекетіндегі 15-айналымның жол шебері Сәлімжан Қазымов та бекеттегі тәжірибелі теміржолшылардың бірі. «2108-2123 км аралығындағы 32 км жолға жауап беремін. Жол арасындағы өлшемді мм-мен есептеп қараймыз. Рельстің екі басындағы арақашықтық 1512-ден кем болмау керек, 1548-ден артық болмау керек. Жұп және тақ жолдарда айына төрт рет бақылау жасаймыз. Бұл жұмыстар қауіптің алдын алу үшін керек», – дейді Сәлімжан Қазымов. Еңбегіне адал теміржолшылардың жауапкершілігі де жоғары.