DB және Alstom пойыздарды қашықтан басқару технологиясын сынақтан өткізуде
Германия темір жолдары (DB) мен Alstom компаниясы Мюнхендегі Штайнхаузен депосында қала маңындағы пойыздың (S-Bahn) маневрлік қозғалысын қашықтықтан басқару мүмкіндіктерін көрсетті. 5G стандартындағы жеке радиобайланыс желісіне негізделген бұл технология машинист пультін диспетчерлік орталықтағы оператордың жұмыс орнына ауыстыруға мүмкіндік береді. Бұл технологиялық процестерді оңтайландырып, пайдаланушы персоналдың жүктемесін азайтады, деп хабарлайды Rail-news.kz.
Сынақтар Alstom компаниясы шығарған 423 сериялы электропойызында жүргізілді. Француздық компания пойызға бейнекамералар мен басқа да сенсорларды қамтитын қосымша жабдықтар орнатты. Қашықтықтан басқару пультінің құнын есепке алғанда, DB-ның бұл жобаға салған инвестициясы шамамен 1 млн еуроны құрады.
Қазіргі уақытта Штайнхаузен депосында тәулігіне 350-ге жуық маневрлік қозғалыс орындалады. Бұған пойыздарды жуу орнына, техникалық қызмет көрсету цехына апару және жолаушыларды отырғызу үшін жолға шығару жұмыстары жатады.
Alstom компаниясы пойыз бен қашықтықтан басқару орталығын байланыстыру үшін арнайы архитектураны қолданады. Бұл қолданыстағы борттық жүйелерден заманауи стандартталған оператор интерфейсіне көшуді қамтамасыз етеді.
Жаңа технологияны қазіргі уақытта DB желісінде жүздеген данасы бар 423, 430, 442, 490 және 1440 сериялы электропойыздарға, сондай-ақ болашақ жылжымалы құрамдарға да қолдануға болады.