Еуропалықтар теміржолды көбірек таңдай бастады
Еуроодақтың Eurostat статистикалық қызметі дайындаған «Key figures on European transport - 2025 edition» жыл сайынғы есебінде теміржол көлігіндегі жолаушылар тасымалының өсу үрдісі жалғасып жатқаны, тіпті оның көрсеткіштері пандемияға дейінгі деңгейден асып түскені атап көрсетілген. Дегенмен, жүк тасымалы саласында ЕО елдерінің теміржол көлігі әлі де болса теңіз және автомобиль тасымалынан артта қалып келеді, деп хабарлайды Rail-news.kz.
2024 жылы ЕО-қа мүше елдердің тұрғындары ішкі маршруттар бойынша жалпы ұзындығы 420 млрд шақырымды құрайтын 8,3 млрд сапар жасаған. Бұған қоса, 150 млн жолаушы трансшекаралық бағыттарда жалпы есеппен 23 млрд шақырым жол жүрген. Еуропа бойынша орташа көрсеткіш бір тұрғынға ішкі қатынастарда 958 шақырымнан, ал халықаралық сапарларда 53 шақырымнан келді.
2024 жылы жалпы жолаушылар айналымы 443 млрд жолаушы-шақырымға жетіп, 2023 жылғы көрсеткіштен 5,8%-ға жоғарылады. Теміржол қызметі әсіресе Венгрия, Австрия және Францияда үлкен сұранысқа ие: бұл елдердің орташа статистикалық тұрғыны бір жылда ішкі бағыттарда тиісінше 1513, 1493 және 1442 шақырым жол жүрген. Ең төменгі көрсеткіш Грекияда тіркелді — небәрі 70 шақырым.
Жүк тасымалы саласында ЕО елдерінің жалпы жүк айналымындағы ең үлкен үлес теңіз көлігіне — 67% (4753 млрд ткм) және автомобиль көлігіне — 25,7% (1821 млрд ткм) тиесілі. Теміржолдың үлесі 5,4% (385 млрд ткм), ішкі су көлігінікі — 1,7% (122 млрд ткм), ал әуе көлігінікі — 0,2% (16 млрд ткм) болды.
2024 жылы теміржол көлігі ЕО елдерінің ешбірінде жүк тасымалы бойынша көшбасшы орынға ие болған жоқ. Теңіз көлігі дамыған елдердің ішінде теміржол үлесі Литвада (30,1%), Словенияда (27,7%), Польшада (21%), Румынияда (17,5%) және Латвияда (17,1%) салыстырмалы түрде жоғары болды. Теңіз порттары жоқ елдердің арасында теміржол көлігінің ең жоғарғы үлесі Австрия (30%), Словакия (29,8%), Венгрия (25,8%) және Чехияда (21,1%) тіркелді.