АҚШ өткелдердегі қауіпсіздікті қамтамасыз ету үшін 1,1 миллиард доллардан астам қаржы бөлмек
АҚШ Көлік министрлігі (USDOT) Федералды теміржол әкімшілігі (FRA) жүзеге асыратын теміржол өткелдеріндегі қауіпсіздікті қамтамасыз ету бағдарламасы бойынша 1,15 млрд АҚШ доллары көлемінде грант бөлінетінін жариялады, деп хабарлайды Rail-news.kz.
USDOT мәліметінше, АҚШ-тың теміржол өткелдерінде жыл сайын 2000-нан астам оқиға орын алып, соның салдарынан орта есеппен 300 адам қаза табады екен.
Осы бастама аясында автомобиль және темір жолдарының әртүрлі деңгейдегі қиылыстарын салу, жерасты және жерүсті өткелдерін тұрғызу және басқа да жобалар қаржыландырылады. Сондай-ақ заманауи автоматты өткел сигнализациясы жүйелерін енгізу қарастырылған. Грант алуға өтінімдер 2026 жылғы 8 маусымнан кешіктірілмей берілуі тиіс.
Теміржол қауіпсіздігіне қарастырылған бұл сома (1,15 млрд АҚШ доллары) USDOT-тың көлік инфрақұрылымына инвестиция салудың кең ауқымды стратегиясының бір бөлігі. Дегенмен, бұл әуе көлігіне бөлінетін қаржыландыру көлемінен айтарлықтай аз. Қазіргі уақытта USDOT АҚШ Конгресінен әуе қозғалысын басқаруды жаңғыртуға қосымша 10 млрд доллар сұрап отыр, ал 2025 жылы бұл мақсаттарға 12,5 млрд доллар бөлінген.
Соңғы жылдары АҚШ-та ұзын құрамды жүк пойыздарымен тасымалдаудың дамуы аясында өткелдердің жабылуының орташа уақыты артты, бұл жол қозғалысына қатысушылар үшін қиындықтар туғызып отыр.