Теміржолшы қазақ тіліннен сабақ беріп жүр

Кейінгі кезде қазақ тілінде сөйлеуге, тіліміздің терең мағыналы сөздерінің мәнісін білуге ынталы адамдар тобы артып келеді, дейді тіл үйрететін оқу орталығында түрлі ұлттар мен ұлыстарға ана тілімізден сабақ беріп жүрген теміржолшы. Теміржол саласында еңбек етіп жүргеніне қарамастан өзінің әубастағы мамандығын да ұмытпай, қаншама жанды мемлекеттік тілді меңгеруіне машықтандырып жүрген маңғыстаулық Зәуре Қосымбаева көп қырлы теміржолшылардан.  

Түбектік атақты ақын-айтыскерлер – Қосымбаевтар отбасынан шыққан ол бірнеше тілді меңгерген. Сондай қабілетінің болғандығынан орыстілді қазақтар мен өзге де ұлт өкілдеріне ана тілімізден және араб тілінің әліппесінен бастап, қос тілден сабақ беріп жүр. Ол өңірдегі «Парасат» оқу орталығында теміржолдағы жұмысынан тыс уақытта, яғни кешкі сағат 19:00 -21:00 аралығында сабақ береді. Аптасына үш рет осылай, тіл үйренгісі келетіндерге бағыт-бағдар сілтеп, ұстаздық етеді.  

-Ана тілін білмегеніне ұялмайтын немесе білсе де өз тілінде сөйлеуді қаламайтын қазақтарды қоспағанда  бүгінде тіліміздің қолданыс көкжиегі кеңіп келеді. Елімізде тұратын өзге ұлт өкілдерінің ғана емес, елдегі шетелдіктер мен  басқа мемлекеттерде тұратындардың да үйреніп жатқанын естіп, біліп, қуанамыз. Өзім неше жылдан бері оқу орталығында және мемлекеттік сатып алуға қатысып, сол бойынша түрлі мекеменің шеңберінде өзге ұлт өкілдеріне тіл үйретіп жүрген маман ретінде бұған көзім жетті. Қазір қазақ тілін білгім келеді дейтіндерге тағы бір қуанышты жаңалық бар. Облыстық мәдениет, тілдерді дамыту және архив ісі басқармасының қолдауымен «Парасат» оқу орталығында өңір тұрғындары үшін қазақ тілі курстары тегін ұйымдастырылуда. Оқыту мерзімі үш айлық курсқа екі жүзге жуық адам қабылданады. Ол жерде алдымен келушілердің тіл білу деңгейі анықталады. Кейін сол бойынша бастауыштан бастап, іс қағаздарын жүргізу деңгейіне дейін топтарға бөлінеді. Сабақтар кешкі уақытта өтетіндіктен бұл жұмыс істейтіндерге де өте ыңғайлы. Осындай мүмкіндіктерден соң түрлі себеппен өз ана тілін білмейтіндер мен туып-өскен еліндегі мемлекеттік тілді меңгергісі келетіндердің біразы қазақ тілін үйреніп, ана тіліміздің қолданыс аясы тағы да кеңи түседі, -  дейді Маңғыстау жүк тасымалы бөлімшесінде өзіне жүктелген міндетке қоса мемлекеттік тілге жауапты маман қызметін де қатар атқарып жүрген Зәуре Қосымбаева.  

Тіліміздің жанашыры боп, құс қанатымен су сепкендей болса да қазақ тілділер қатарын кеңітіп жүрген ол Маңғыстау теміржолында он жылдан астам еңбек етеді. Жүк тасымалы бөлімшесіндегі іс-шаралардың тізгінін ұстап, көрігін қыздырады. Біраз жыл түбектегі жоғарғы оқу орнында ұстаздық еткен Зәуре Қосымбаева теміржолдағы жұмысын 2013 жылы бастайды. Қазақ тілінің аудармашысы болып саладағы еңбекке араласады, қазір ол штат қысқартылып, өзге жұмысқа ауысса да әлі күнге бұл міндетті де қатар алып, мемлекеттік тілдің мерейі үшін қызмет етіп келеді.