Alstom Белград метросының алғашқы желісіне пилотсыз пойыздар жеткізбек
Alstom компаниясы Белград метрополитенінің бірінші кезеңіндегі толық автоматтандырылған 1-желіні «дайын күйінде» салу жобасының орындаушысы ретінде таңдалды. Келісімшарт құны 915 млн еуроны құрайды. Бұл кезеңде ұзындығы 15 шақырым болатын (оның 11 шақырымы тоннель арқылы өтеді) 15 станциядан тұратын учаскені жабдықтау жоспарланған, деп хабарлайды Rail-news.kz.
Бұл жобада Alstom жүйелі интегратор рөлін атқарады. Компания Metropolis топтамасына жататын 32 үш вагонды пилотсыз пойызды жеткізуге, сондай-ақ сигнализация және байланыс жүйелерін, электрмен жабдықтауды, басқару орталығы мен депо жабдықтарын, киберқорғаныс құралдары мен платформалық есіктерді орнатуға жауапты. Бұған қоса, компания желіге рельс төсеу жұмыстарын да жүргізеді. Электропойыздар Alstom компаниясының Валансьендегі (Франция) зауытында дайындалады.
Жобаға Франция үкіметі Сербиямен екіжақты ынтымақтастық аясында қаржылай қолдау көрсетіп отыр.
Метро желісінде пойыздардың 90 секундтық аралықпен (интервал) жүруін қамтамасыз ететін Urbalis радиоарналы пойыз қозғалысын басқару жүйесі (CBTC) енгізіледі.