Бірге оқыған теміржолшылар 60 жылдан соң бас қосты

Тараз теміржол, көлік және коммуникация коледжінің тарихы өткен ғасырдың отызыншы жылдарынан бастау алады. Тоқсан жылдан астам уақыт ішінде білім беру мекемесі 50 мыңнан астам түлекті қанат қақтырған.

 Биылғы жаңа оқу жылының қарсаңында осы білім ордасын 1962 жылы бітірген түлектердің 60 жылдан соң басқосуы өтті. Осында өткен балғын шақтарын, білім берген ұстаздарын еске алып, Тараз төрінде өткен кездесуге еліміздің әр қиырынан, тіпті көршілес елдерден де түлектер келді. Бүгінде украин этно-мәдени бірлестігінің төрағасы Федор Клименко топтастары жайлы әсерлі естелігімен бөлісті.

– Топтастарымыздың дені – өз мамандығынан алыстап кетпеген, көбісі саналы ғұмырын теміржолда өткізген жандар. Олардың қатарында Жамбыл локомотив пайдалану депосында ұзақ жыл еңбек еткен 1 санатты машинистер – Карим Мендибаев, Александр Анисимов және ұзақ жыл Қостанай локомотив пайдалану депосында еңбек еткен 1 санатты машинист Аманкелді Сапарбаев сынды Құрметті теміржолшы атанған майталмандар шыққаны – біздің мақтанышымыз. Евгений Гостев осы колледжде «Эксплуатация, қозғалыс құрамын жөндеу, техникалық қызмет көрсету – электровоз машинисінің көмекшісі» мамандығы бойынша өндірістік шебер болып 50 жыл еңбек етті. Ал Фарид Абрасилов училищеден кейін Новосибирск теміржол транспорты институтын бітірді, одан кейін Алматы жоғары партия мектебінде тыңдаушы болып, Қырғызстанда ОК БЛКЖО бірінші хатшысы болды. Асқар Абрашов ҰҚК Жоғары мектебін бітіріп, ішкі барлау қызметінде көптеген жыл еңбек етіп, полковникке дейін өсті. Сіз Жамбыл облыстық «Знамя труда» газетінде талай жыл фотограф болып еңбек еткен Валерий Сутуловтың осы колледждің түлегі екенін білесіз бе? КСРО Жазушылар Одағының мүшесі, 24 пьеса мен 18 кітаптың авторы, екі киносценарий жазған Валерий Куклин де біздің топтың түлегі. Ол қазір Берлинде тұрады, орыстілді «Руский переплет» интернет-басылымының редакторы. В.Куклиннің «Страна моя, Джамбуля, какой я ее знаю и люблю» кітабы жамбылдықтарға таныс. Жалпы, біздің ортамыздан шығармашыл жандар көп шықты. Евгений Мягков колледжді бітірген соң С.М.Киров атындағы ҚазМУ-дің журналистика факультетіне түсіп, «Дружные ребята» газетінің меншікті тілшісі болды, 1980 жылдан «Комсомольская правда» газетінде еңбек етті, – деді Ф.Клименко.  

Ал Федор Клименко осы колледжді тәмәмдаған соң Жамбыл гидромелиоративтік-құрылыс институтын бітіріп, қаланың су шаруашылығын басқарыпты. Бүгінде зейнетте, қоғамдық жұмыстармен айналысады.  

Кездесудің бел ортасында жүрген жерлесіміз, Құрметті теміржолшы Карим Мендибаевты әңгімеге тартқан едік. «Негізі бұл жетім балаларға арналған арнаулы орта білім беретін №12 кәсіби-техникалық училище болатын. Тек 1964 жылы мұндағы мамандықтар ауқымы кеңейіп, №88 қалалық кәсіптік-техникалық училище болып қайта жасақталды. Өте әсерлі кездесу болды, топтастарымды көріп бір жасап қалдым», – деді Карим Салахұлы.  

– 1930 жылы Әулие-Ата станциясында ашылған оқу орны Түрксіб құрылысынан кейін теміржолға арнайы мамандар дайындау мақсатын көздеген болса керек. Осы уақыт ішінде 50 мыңнан аса маман дайындалыпты. Биыл 90-шы түлектерімізді шығарып салдық. 60 жылдан соң өздері білім алған оқу орнына келген түлектермен кездесу біз үшін үлкен жаңалық болды. Бүгінде зейнет жасына жетіп отырған кешегі түлектерімізге құрметіміз жоғары, – дейді Тараз теміржол, көлік және коммуникация колледжінің директоры Ұлжан Кенжебаева.